Ertu nokkuð að gleyma þér?

Senn er árið á enda og þrátt fyrir ýmsar áskoranir tökum við nýju ári fagnandi með von í brjósti. Til siðs er að kveðja árið með ljósaleik og margir styðja við björgunarsveitirnar á þessum tímamótum, ýmist með flugeldakaupum, Rótarskoti eða frjálsum framlögum.

Langt er liðið á jólahátíðina en við eigum þó enn svolítið inni og um að gera að njóta þess. Dæmin sanna hins vegar að allur er varinn góður þegar leika skal með ljós og eld.

Reykskynjarar og slökkvitæki sanna gildi sitt

Skömmu fyrir jól vaknaði ung fjölskylda á Selfossi upp um miðja nótt við það að reykskynjari fór í gang. Kviknað hafði í, líklega út frá sprittkerti og mátti litlu muna að illa hefði farið. Sprittkertið var staðsett í veggkertastjaka eins og eru svo vinsælir víða um þessar mundir. Einhverjar skemmdir urðu á innanstokksmunum en fyrir mestu var að allir komust heilir frá þessu og heimilisfólki tókst að slökkva eldinn með slökkvitæki áður en hann barst í sjálft húsið.

Lögregla og slökkvilið mættu svo til að reykhreinsa húsið og sérhæft þrifateymi frá tryggingafélagi fjölskyldunnar kom svo í kjölfarið. Skemmst er frá því að segja að fjölskyldan var afar þakklátt fyrir að ekki fór verr þótt vissulega hafi þessi uppákoma sett strik í reikninginn skömmu fyrir jól. Húsmóðirin skrifaði pistil á samfélagsmiðla þar sem hún biðlaði til allra að hafa reykskynjara og slökkvitæki til taks á sínu heimili.

Á annan í jólum bárust aftur fréttir af eldi í íbúðarhúsi sem kviknaði í út frá kertaskreytingu á borði og var þar um þó nokkrar reykskemmdir að ræða. Engan sakaði en þegar rætt var við fulltrúa slökkviliðsstjóra á svæðinu sagði hann: „Það er það sem gerist, fólk gleymir að slökkva.“ Það ætlar enginn að gleyma sér en slíkt gerist þó. Þess vegna eru forvarnir svo mikilvægar.

Förum varlega um áramótin

Forvarnir um áramót eru einnig nauðsynlegar. Mikilvægt er að fara varlega um áramótin með því að nota flugeldagleraugu og gæta fyllsta öryggis þegar flugeldum er skotið upp. Þannig getum við komið í veg fyrir óhöpp og alvarleg slys. Flugeldagleraugu eru einföld leið til að vernda augun og þess vegna hvetjum við alla til að nota þau um áramótin, hvort sem þú ætlar að skjóta upp flugeldum eða horfa á.

Hægt er að nálgast flugeldagleraugu á flugeldamörkuðum björgunarsveitanna og í útibúum Sjóvár um land allt. Öryggisakademían hefur gefið út nokkur myndbönd sem minna á það sem hafa þarf í huga við meðferð flugelda en Slysavarnafélagið Landsbjörg og Sjóvá standa saman að Öryggisakademíunni. Hlutverk hennar er að miðla öryggis- og forvarnarskilaboðum tengdum flugeldum til allra aldurshópa.

Sjóvá og Slysavarnafélagið Landsbjörg hafa einnig tekið saman helstu atriði sem hafa þarf í huga þegar skjóta á upp flugeldum og er þau að finna á sjova.is. Þar er meðal annars rætt um að geyma skuli flugelda á öruggum stað, hafa slétt og stöðugt undirlag undir flugeldum, gæta þess að skotstaðurinn sé í hæfilegri fjarlægð frá fólki, húsi og bílum, nota hanska til að vernda hendur, kveikja í með útréttan handlegg, aldrei megi halla sér yfir flugelda og að hafa þurfi sérstakar gætur á börnum og dýrum. Halda þarf dýrum innandyra þar sem þau heyra sem minnst í sprengingum og eru örugg. Einnig er vert að muna að neysla áfengis og meðferð flugelda fara ekki saman.

Höldum heil af stað

Við viljum öll fara vel af stað inn í nýja árið og njóta samverunnar með okkar nánustu. Til að auka líkurnar á að svo megi verða er mikilvægt að huga að forvörnum í tíma en líkt og máltækið segir er kapp best með forsjá. Höfum því hyggjuvitið með í för svo við getum notið stundarinnar. Gleðilega hátíð.

Höfundur er verkefnastjóri forvarna hjá Sjóvá.