Kórónuveiran hefur frestað leikjum 16 liða í ensku úrvalsdeildinni

Einungis fjögur lið hafa getað leikið alla sína leiki án þess að kórónuveiran skerist í leikinn. Liðin fjögur eru toppbaráttuliðin Manchester City, Chelsea og Arsenal, ásamt fallbaráttuliðinu Newcastle.

Nýráðinn knattspyrnustjóri Newcastle, Eddie Howe, spyr sig hvort að það sé anngjarnt að sum lið haldi ótrauð áfram á meðan að leikjaálag safnast upp hjá öðrum liðum.

„Ég hef alltaf sagt að ég vilji spila. Ég hef hins vegar bent á að það sé deildinni til framdráttar að öll liðin spili á sömu forsendum.“

„Ég set spurningamerki við það hvort að þetta hafi verið sanngjarnt fyrir alla,“ sagði Howe.

„Ef lið eiga uppsafnaða leiki sem verða færðir og spilaðir í fevrúar eða mars, þá græða þau lið á því að vera með nýja leikmenn í þeim leikjum, en ekki við,“ sagði Howe að lokum og átti þá við þá leikmenn sem bætast við liðin í janúar.