Klopp býst við að missa burðarása í mánuð en hyggst ekki nýta gluggann

Liverpool kemur til með að vera án alla vega tveggja af þeim þremur í um það bil mánuð vegna mótsins sem hefst í Kamerún 9. janúar og lýkur 6. febrúar.

Salah leikur fyrir Egyptaland, Mané fyrir Senegal sem tapaði úrslitaleiknum gegn Alsír á síðasta Afríkumóti, og Keita fyrir Gíneu.

„Ég er ánægður með hópinn sem við höfum og við erum enn með valkosti,“ sagði Klopp á blaðamannafundi í gær fyrir leikinn gegn Newcastle í kvöld.

„Við vissum að þrír væru á leið á mótið og að að minnsta kosti tveir þeirra myndu komast ansi langt á mótinu. Getur maður verið fullkomlega undirbúinn fyrir það? Eins og það sé til maður sem komi í stað Sadio, í stað Mo, og í stað Naby? Það er snúið í öllum tilfellum,“ sagði Klopp.

Salah er markahæstur í ensku úrvalsdeildinni með 15 mörk og Mané hefur skorað sjö. Klopp er þó ekki að barma sér mikið yfir því að missa þá vegna Afríkumótsins.

„Málið er að það eru svo margir leikir fram undan á meðan við erum allir enn hérna – þéttasta leikjatörnin er núna – en síðan eigum við líka fullt af leikjum þegar Mo og Naby og Sadio verða ekki hérna.

Það þýðir að við þurfum að stilla upp liðið fyrir þessa leiki, líka fyrir leikina í bikarkeppnunum, og svona er staðan og maður getur aldrei undirbúið sig fullkomlega fyrir svona lagað. Við erum hins vegar ansi vissir um að við finnum lausnir,“ sagði Klopp.