„Eins og fram hefur komið í uppgjörstilkynningum er lausafjárstaða félagsins sterk og því hefur ekki verið þörf á að draga á línuna. Það er von félagsins að ekki þurfi að draga á lánalínuna en hún hefur verið mikilvægur öryggisventill á þessum síbreytilegu óvissutímum,“ segir í svari Icelandair.
Í aðdraganda hlutafjárútboðs Icelandair haustið 2020 náðist samkomulag milli flugfélagsins og stjórnvalda um ríkisábyrgð á allt að 120 milljóna dala lánalínu, jafnvirði um 15,8 milljarða króna miðað við núverandi gengi, sem yrði veitt af Íslandsbanka og Landsbankanum. Ádráttartímabilið yrði tvö ár frá september 2020 og ábyrgðin myndi ná til yfir 90 prósenta af þessum lánum.
Skilmálar ríkisábyrgðarinnar voru þeir að eigið fé Icelandair héldist yfir 2 prósentum og þá yrði sett hámark á mánaðarlegan ádrátt á línuna að fjárhæð 20 milljónir Bandaríkjadala. Óheimilt yrði að draga á lánalínuna nema aðrir kostir væru fullreyndir.
Innherji greindi nýlega frá umsögn Félags atvinnurekenda um fjárlagafrumvarpið en þar var lagt til heimildin til að veita Icelandair ríkisábyrgð yrði felld út úr fjárlagafrumvarpinu. Benti félagið á að veiting ábyrgðarinnar fæli í sér áhættu fyrir skattgreiðendur auk þess að veita Icelandair samkeppnisforskot á keppinautinn Play air, í formi lægri fjármagnskostnaðar.
Icelandair segir að lánalínan hafi verið mikilvægur hlekkur í því að klára fjárhagslega endurskipulagningu félagsins haustið 2020.
„Lánalínan hjálpaði félaginu í samningaviðræðum við kröfuhafa og aðra aðila með það að markmiði að tryggja áframhaldandi rekstrargrundvöll félagsins, verja störf og leggja grunninn að endurreisn íslenskrar ferðaþjónustu eftir að hún fór niður í algjört lágmark vegna COVID-19,“ segir í svari flugfélagsins.
„Í kjölfar þess að endurskipulagningunni lauk með farsælum hætti hefur Icelandair haldið uppi tíðum flugsamgöngum, skilað tugum milljarða til ríkisins í gegnum skatta og opinber gjöld ásamt umtalsverðum afleiddum áhrifum.“
Innherji er nýr sjálfstæður áskriftarmiðill innan Vísis sem mun einkum beina kastljósinu að viðskiptalífinu, efnahagsmálum og stjórnmálum. Fyrst um sinn verður efnið endurgjaldslaust og aðgengilegt öllum á Vísi en með tímanum verður einungis hægt að nálgast Innherja gegn greiðslu. Áhersla er lögð á vandaðar fréttir, fréttaskýringar, viðtöl og hlaðvörp auk þess sem Innherja er ætlaður að vera vettvangur skoðanaskipta fólks úr atvinnulífinu og stjórnmálum.
