Mourinho var rekinn frá Tottenham í apríl eftir sautján mánuði í starfi. Ryan Mason stýrði Spurs út síðasta tímabil og Nuno Espirito Santo tók svo við liðinu í sumar.
Ekki voru allir ánægðir með stjóratíð Mourinhos hjá Tottenham en hann fékk stuðning úr óvæntri átt í gær, frá sjálfum Tony Adams sem fór yfir leik Tottenham og Arsenal á Sky Sports. Skytturnar unnu öruggan sigur, 3-1.
„Mér fannst Mourinho reyndar gera stórkostlega hluti hjá Spurs. En ég hugsaði aldrei um hann sem Tottenham-stjóra. Hann var ekki nógu sóknarsinnaður fyrir þá en hann var að hnoða þessu saman,“ sagði Adams.
„Þeir voru með gott leikskipulag sem þeir eru ekki með núna svo ég vil vera í búningsklefanum hjá Arsenal.“
Tottenham byrjaði tímabilið af krafti og vann fyrstu þrjá leiki sína í ensku úrvalsdeildinni. Síðustu þrír leikir hafa hins vegar tapast með markatölunni 1-9 og farið er að hitna undir Nuno.
Mourinho tók við Roma í sumar. Liðið tapaði fyrir Lazio, 3-2, í Rómarslag í gær. Roma er í 4. sæti ítölsku úrvalsdeildarinnar.
