Lokadagur Ryder-bikarsins fer fram í dag | Rástímarnir klárir

Eins og seinustu daga verður hægt að fylgjast með lokadegi Ryder-bikarsins á Stöð 2 Golf, en bein útsending hefst klukkan 16:00.

Rory McIlroy átti erfitt uppdráttar í gær, en hann stígur fyrstur á svið fyrir evrópska liðið. Hann spilar gegn Bandaríkjamanninum Xander Schauffele sem situr í fimmta sæti heimslistans, tíu sætum fyrir ofan McIlroy. 

Næstu menn eru þeir Patrick Cantlay, nýkrýndur TOUR Championship meistari, og Írinn Shane Lowry, áður en efsti maður heimslistans, Spánverjinn Jon Rahm, mætir Scottie Scheffler.

Samlandi Rahm, Sergio Garcia, og Bandaríkjamaðurinn Bryson DeChambeau eigast við þar á eftir og í fimmtu viðureign dagsins mætast þeir Collin Morikawa og Viktor Hovland.

Veislan heldur áfram því í sjöttu viðureign dagsins mætast þeir Dustin Johnson og Paul Casey, og þar á eftir stíga þeir Brooks Koepka og Bernd Wiesberger á stokk áður en Tony Finau mætir Ian Poulter.

Ef allt gengur eftir áætlun ættu Justin Thomas og Tyrell hatton að hefja sinn hring klukkan rétt rúmlega hálf sex og um tíu mínútum síðar fara þeir Harris English og Lee  Westwood af stað.

Seinustu tvær viðureignir dagsins eru svo viðureignir Jordan Spieth og Tommy Fleetwood annars vegar, og lokaviðureignin er á milli Daniel Berger og Matt Fitzpatrick.

Eins og seinustu ár er mikil stemning í kringum mótið, og í ár er stemningin sérstaklega með Bandaríkjamönnum í liði. Þeir eru á heimavelli og með afgerandi forystu og hafa því leyft sér að hafa gaman að þessu. Þeir Daniel Berger og Justin Thomas létu það eftir sér í gær að fá sér einn kaldan áður en haldið var af stað af fyrsta teig.

Viðureignir dagsins

Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum.