Missti með­vitund og fékk heila­hristing eftir að keyrt var aftan á bíl hans

Kom þetta fram í frétt Fótbolti.net eftir að í ljós kom að Máni Austmann hefði horft á leikinn gegn Keflavík úr stúkunni. Sigurður Heiðar Höskuldsson, þjálfari Leiknis, sagði aðspurður eftir leik að leikmaðurinn hefði lent í bílslysi og yrði ekki meira með á leiktíðinni. 

Máni sjálfur staðfesti svo í viðtali við Fótbolti.net að hann yrði frá næstu tvo mánuðina hið minnsta.

„Ég var stopp og svo er dúndrað hraustlega aftan á bílinn. Ég missi meðvitund og fékk heilahristing. Bakið á mér er í algjöru rugli, ég er enn fastur í bakinu og hálsinum. Hálsinn er mjög slæmur eins og staðan er núna. Veit ekki hvernig bataferlið verður. Einhverjir hafa sagt við mig að þetta sé mánuður og aðrir tala um lengri tíma. Það kemur bara í ljós.“

Máni sagði einnig í viðtalinu að hann hefði rætt við sjúkraþjálfara sem hefði mælt með því að hann tæki því rólega í allavega tvo mánuði. Hann ætlar því að horfa á lokaleik Leiknis á leiktíðinni og svo mögulega skella sér í sumarfrí.

„Svo er bara að vona það besta.“

Leiknir Reykjavík er með 22 stig í 8. sæti Pepsi Max deildarinnar þegar ein umferð er eftir. Ljóst er að félagið heldur sæti sinni í deildinni og verður áfram í deild þeirra bestu á næstu leiktíð. 

Leiknismenn mæta í Fossvoginn í lokaumferð deildarinnar þar sem Víkingar tryggja sér Íslandsmeistaratitilinn með sigri. Lokaumferð Pepsi Max deildar karla fer fram á laugardaginn kemur, 25. september.

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði.