Sá mikilvægasti á ferli Hannesar þurfti að berjast fyrir því að sannfæra stjórn KR

Hannes hefur ákveðið að leggja landsliðstreyjuna á hilluna en hann er ekki í vafa um hver hafi hjálpað sér mest á ferli sem spannar meðal annars Evrópumót og heimsmeistaramót. Guðmundur Hreiðarsson fékk Hannes til KR í lok árs 2010.

„Hann hefur verið mikilvægasti maðurinn á mínum ferli. Það er hann sem að tekur mig í KR og er markmannsþjálfarinn minn þar í þrjú ár og svo í landsliðinu í um sjö ár. Það er maður sem að studdi við bakið á mér í gegnum súrt og sætt og bakkaði mig upp, og ég á honum ótrúlega mikið að þakka,“ segir Hannes um Guðmund. Þeir ræddu báðir við Svövu Kristínu Gretarsdóttur í innslagi sem sjá má hér að neðan.

Guðmundur þekkir Hannes betur en flestir og lofar sinn gamla lærisvein í hástert:

„Ég er búinn að fylgjast með honum frá svona 2009 og fer að „mónitora“ hann af alvöru 2010. Þá var ég markmannsþjálfari hjá KR og við vorum að leita að arftaka fyrir Stefán Loga [Magnússon] sem var svo seldur til Lilleström,“ segir Guðmundur.

Kynntist „hugarfari sigurvegarans“ hjá Hannesi

„Ég þurfti að berjast svolítið fyrir því að sannfæra stjórnina um að Hannes væri rétti maðurinn fyrir okkur. Það var ekkert erfitt að sannfæra Rúnar Kristinsson sem var þá þjálfari. Þá þekkti ég Hannes ekki neitt en mér fannst einhver „karakter-ára“ yfir honum. Mér fannst hann þá líka vera tiltölulega hrár markmaður,“ segir Guðmundur og bætir við:

„Þegar ég svo kynntist honum fyrir alvöru og við fórum að vinna saman, nánast upp á hvern dag í tíu ár, þá kynntist maður „hugarfari sigurvegarans“. Hann er ekki með meðfædda hæfileika en hann er með fullt af öðrum þáttum sem eru meðfæddir og svo er hann vinnudýr. Hann er tilbúinn að leggja á sig ómælda vinnu til að ná árangri, sem og hann gerði, og hann fór yfir margar hindranir.

Það má segja að varðandi mörg af þessum verkefnum sem hann skaffaði og sigraði þá hafi það verið eins og fyrir suma að hlaupa tíu maraþonhlaup í beit. Hann er alltaf tilbúinn að leggja sig fram, finna bestu leiðina, og stundum þarf hann auðvitað að hafa einhvern til að segja sér til um hver sé besta leiðin. En sem karakter… ég gæti haldið áfram að tala um hann í allan dag en þetta er alveg geggjaður karakter. Svo heill í gegn og tilbúinn að leggja allt á sig til að ná árangri. Það segir meira en mörg orð.“