Ávarpaði fund World Pride

Í tilkynningu frá forsætisráðuneytinu segir að á fundinum hafi sjónum verið beint að velferð unga fólksins í hinsegin samfélaginu og mikilvægi þess að Norðurlöndin snúi bökum saman þegar komi að því styrkja stöðu og réttindi hinsegin fólks.

Forsætisráðherra hafi lagt áherslu á að mikilvægt væri að huga að stefnumótun og lagasetningu í málaflokknum og einnig að viðhorfum og viðurkenningu samfélagsins. Þá sagði hún frá nýlegri lagasetningu á Íslandi um rétt ungmenna 15 ára og eldri til að breyta kynskráningu sinni í samræmi við eigin kynvitund.

Enn fremur væru ný lagaákvæði sem banni óafturkræfar aðgerðir hjá börnum sem fæðist með ódæmigerð kyneinkenni án samþykkis þeirra, mikilvæg réttarbót fyrir intersex börn.

World Pride í Kaupmannahöfn stendur yfir alla vikuna og eru einhvers konar alheims Hinsegin dagar undir merkjum InterPride, alþjóðasamtaka hinsegin hátíða sem Hinsegin dagar í Reykjavík eru aðilar að.