Arden sagði að um áramótin yrði tekið upp einstaklingsbundið mat varðandi ferðalög án þess að þurfa að sæta sóttkví. Áhersla væri lögð á að ljúka bólusetningu nýsjálensku þjóðarinnar fyrir lok þessa árs.
Nýsjálendingar hafa frá upphafi faraldursins brugðist við með algerri lokun landamæranna og útgöngubanni af og til á einstökum stöðum. Landið er hins vegar töluvert á eftir ríkjum Evrópu og norður Ameríku í bólusetningum.
Harðar aðgerðir stjórnvalda á Nýja-Sjálandi hafa skilað þeim árangri að 26 hafa látist þar vegna Covid-19 frá upphafi faraldursins en um fimm milljónir manna búa í landinu.