Segir lög­reglu beita dag­bókar­færslum til að þrýsta á styttri opnunar­tíma skemmti­staða

Jón Bjarni Steinsson, eigandi Dillon, segir að það hafi verið brjálað að gera í miðbæ Reykjavíkur undanfarið, allt frá afléttingu samkomutakmarkana fyrr í sumar og var gærkvöldið engin undantekning. 

Einhverjir hafi ætlað að nýta mögulega síðasta kvöldið fyrir aðgerðir. Ríkisstjórnin hefur boðað til fundar klukkan 16 í dag og má vænta þess að ráðherrar kynni nýjar sóttvarnatakmarkanir að fundi loknum.

„Það er búið að vera brjálað að gera. Ég er að sjá sömu sölutölur og árið 2017. Það hefur verið ofboðslega fínt að gera og mjög gaman,“ sagði Jón Bjarni.

Ekki eins og venjulegur fimmtudagur

Ásthildur Bára Jensdóttir, rekstrarstjóri Bankastræti Club segir að það hafi verið meira að gera í gær heldur en aðra fimmtudaga.

„Við bjuggumst við litlu en það varð meira en við bjuggumst við. Þetta var ekki eins og venjulegur fimmtudagur í gær.“

Segir lögregluna nýta dagbókarfærslur til þess að ná sínu í gegn

Ásgeir Guðmundsson, eigandi Röntgen Bar, segir að það hafi verið mikið að gera í miðbænum upp á síðkastið.

„Ég vill kannski gefa lítið fyrir það að miðbærinn hafi verið eins og stríðsástand síðustu daga. Þetta er bara gamla góða Reykjavíkur djammið. Lögreglan hefur gefið það út opinberlega að hún vilji stytta opnunartímann og hún beitir dagbókarfærslum til þess.“

Aðspurður hvað hann eigi við með því segir hann að staða mála sé stórlega ýkt í dagbókarfærslum lögreglunnar um helgar. Sjálfur hafi Ásgeir ekki orðið vitni af slíku ástandi né miklum slagsmálum.

„Stjórnendur hafa lýst því opinberlega að þeir vilji nýta ástandið til þess að stytta opnunartíma og benda á reynslu af Covid19 tíma þar sem fólk mátti ekki koma saman. Mitt mat er að lögreglan sé að nýta dagbókarfærslur til þess að ná sínu í gegn.“

Rökvilla

„Auðvitað var brjálað að gera í lok júní þegar allir voru komnir út og fengu loksins að fagna breyttu ástandi en þessar ofsafengnu lýsingar að stríðsástand hafi verið í miðbænum. Þær eru bara ekki sannar. Þetta er rökvilla. Eins og bóndi sem hleypir kvígum sínum út að vori og skýtur þær jafnóðum í túninu heim vegna þess að þær eru óstýrlátar fyrst um sinn.“

Jón Bjarni segist ekki verða var við mikil ólæti í borginni um helgar. Dillon sé vissulega staðsettur ofarlega á Laugavegi og lokar hann klukkan þrjú á nóttunni.

„Það er aldrei neitt vesen hjá mér. Meðalaldurinn er hár meðal gesta og það eru kannski frekar læti eftir klukkan þrjú, ég veit það ekki. En á mínum stöðum hef ég ekki orðið var við neitt vesen. Ekki þetta stríðsástand að minnsta kosti.“

„Sultuslakur“

Þá segist hann pollrólegur yfir mögulegum aðgerðum. Þó óþægilegt sé að bíða eftir fréttum.

„Ég er með risa tónleika í garðinum hjá Dillon á morgun. Dimma er að spila, Sprite Zero Klan og fleiri. Og nú er ég að hugsa hvort ég eigi að auglýsa? Á ég að ferja hátalara í garðinn? Það er óþægilegt að bíða og þá sérstaklega á föstudegi klukkan þrjú. En ég er öllu vanur. Ég er sultuslakur,“ segir Jón Bjarni.