Togarar staðnir að brottkasti: Fiskistofa segir þörf á úrbótum

Við sögðum frá því um helgina að Fiskistofa svipti bát veiðileyfi í tvær vikur nú í júlí vegna stórfellds brottkasts. Þetta er í fyrsta sinn sem bátur er sviptur leyfi vegna brottkasts eftir að drónaeftirlit var tekið upp hjá Fiskistofu nú í janúar. 

 Elín Björg Ragnarsdóttir er sviðsstjóri veiðieftirlits hjá Fiskistofu.

„Drónarnir eru að veita okkur nýja sýn. Áður vorum við bara að róa með bátum en núna erum við að fá allt aðra sýn. Við höfum notað dróna nær landi frá því í janúar en erum byrjuð að fara lengra út með þá,“ segir Elín. 

Það sé aðeins nýlega sem drónarnir fari lengra út á miðin.

„Fyrstu málin varðandi brottkast á togurum eru farin að koma inn á borð hjá okkur. En við erum hins vegar  ekki búin að fara í margar eftirlitsferðir á togaramiðin,“ segir hún.

Mikið brottkast þrátt fyrir góða kynningu

Hún segir að eftirlitið með drónum hafi verið vel kynnt síðustu mánuði og greinin fengið leiðbeiningar. Það kom því á óvart hversu algengt brottkastið sé.  

„Brottkast er meira en við hefðum viljað sjá. Við höfum verið að leita eftir samstarfi við greinina til að bæta umgengni við auðlindina. Brottkast skaðar hagsmuni allra sem hafa hag af þessari ábyrgu nýtingu auðlindarinnar. Þess vegna þarf samstöðu um að þessi hegðun verði ekki liðin.  Samstaða er lykillinn að vernda þessa hagsmuni,“ segir Elín. 

Elín segir að Fiskistofa hafi óskað eftir samráði við Sjávarútvegsráðuneytið, Landssamband smábátaeigenda og Samtök fyrirtækja í sjávarútvegi. Þessir aðilar þurfi að vinna saman að úrbótum í greininni.  

Aðspurð um hvernig hagsmunaðilar hafi tekið í málið segir Elín: 

„Ég hef fulla trúa á að það náist að sameinast um  úrbætur.“