„Lík­legt að lánar­drottnar hafi ekki haft trú á lang­tíma­á­ætlunum þeirra“

Björn Berg Gunnarsson, deildarstjóri í greiningardeild Íslandsbanka sem hefur rannsakað fjármál knattspyrnufélaga, ræddi við Fréttablaðið um stöðu Börsunga. Vísir hefur reglulega greint frá slæmri stöðu Börsunga en Björn Berg hefur kafað dýpra ofan í tölurnar og skuldavesen spænska félagsins.

„Maður man varla eftir annarri eins stefnu hjá félagi af þessari stærðargráðu. Fyrir vikið óttast ég að einhverju leyti að staðan sé mun verri en búið er að gefa út. Skuldastaðan hefur versnað hratt og reksturinn engan veginn staðið undir sér,“ segir Björn til að mynda í viðtalinu við Fréttablaðið.

„Þetta virðist gefa til kynna að félaginu hafi ekki tekist að endurfjármagna skuldir sínar nægilega vel, sem gæti komið því í alvarlega stöðu. Líklegt er að lánardrottnar hafi ekki haft trú á langtímaáætlunum þeirra.“

„Maður hélt alltaf að Barcelona, eitt af stærstu félögum heims, ætti að geta verið rekið réttu megin við núllið byggt á sjónvarps- og auglýsingatekjum ásamt þeim tekjum sem koma inn í gegnum Meistaradeild Evrópu.“

Börsungar eru í óðaönn að reyna semja við Lionel Messi sem samningur hans við félagið rann út á dögunum. Messi er á leið í úrslitaleik Suður-Ameríkubikarsins og mun ekki skrifa undir á næstu dögum. 

Hann er tilbúinn að taka á sig launalækkun en segist ekki vera tilbúinn að skrifa undir nema félagið sé samkeppnishæft. Það gæti verið erfitt ef félagið getur ekki eytt sömu upphæðum og undanfarin ár.

„Ekki er hægt að reka félag eins og Barcelona án þess að eyða verulegum upphæðum, en það hefði verið góð lausn að reyna að ná samkomulagi við lánveitendur um ábyrgari rekstur félagsins. Undanfarin ár hefur félagið verið rekið með skammtímasjónarmið í huga og það vantar oft að einstaklingar axli ábyrgð á gjörðum sínum,“ segir Björn að endingu.

Barcelona hefur verið duglegt að semja við leikmenn á frjálsri sölu í sumar en vegna skuldastöðu félagsins er enn óvíst hvort félagið megi skrá þá í leikmannahóp sinn. Um er að ræða þá Eric Garcia, Memphis Depay og Sergio Aguero.

Virðist sem nær allir leikmenn liðsins séu til sölu. Þá hefur það verið staðfest að ef Messi verði áfram þá þurfi að selja framherjann Antoine Griezmann þar sem hann sé á of háum launum til að hægt sé að halda báðum hjá félaginu. Barcelona keypti hann dýrum dómum en hann gæti endað á brunaútsölulistanum með leikmönnum á borð við Ousmane Dembélé, Miralem Pjanic og Philippe Coutinho.

Rúmur mánuður er í að La Liga, spænska úrvalsdeildin fari af stað, og verður forvitnilegt að sjá hvernig leikmannahópur Börsunga verður er flautað verður til leiks.