Skiltakonan hugsaði ekki um neitt nema að koma sér í sjónvarpið

Kona ein mætti til að horfa á fyrsta dag Frakklandshjólreiðanna og hafði með sér risaskilti. Það er talið að hún beri ábyrgð á risaárekstri sem varð 45 kílómetrum frá endamarkinu á fyrstu keppnisleiðinni frá Brest til Landerneau.

Konan með skiltið er enn nafnlaus en lögreglan hefur fundið út hver hún er og var hún handtekin í gær og tekin í yfirheyrslu.

Það er ekki vitað hvað hún ætlaði sér að gera eða hverju hún var að mótmæla ef hún var þá að mótmæla einhverju. Á þessu risaskilti hennar stóð „ALLEZ OPI-OMI!“ á frönsku sem þýðir „Áfram amma og afi“ á íslenskunni.

Það bendir því allt til þess að hún ætlaði að skila kveðju til ömmu sinnar og afa sem væntanlega eru aðdáendur Frakklandshjólreiðanna.

Konan var ekkert að horfa á hjólreiðakappana þegar þeir komu á fullri ferð heldur var aðeins að hugsa um að koma skiltinu sínu fyrir sjónvarpsvélarnar sem fóru á undan hópnum.

Skiltið hennar rakst í þýska hjólreiðamanninn Tony Martin sem var meðal fremstu manna. Hann féll í jörðina og í framhaldinu féllu fjölmargir hjólreiðamenn til viðbótar. Útkoman var hrúga af mannlausum hjólum og liggjandi hjólreiðaköppum.

Atvikið orsakaði margra mínútna töf á keppninni og strax fóru menn að benda á umrædda konu sem sökudólg. Yfirmaður Frakklandshjólreiðanna hefur hótað því að kæra konuna og sýna fólki sem sýnir slíkt ábyrgðarleysi að því fylgi miklar afleiðingar.

Konan með skiltið gæti líka átt yfir höfði sér tveggja ára fangelsi auk þess að þurfa að borga meira en fjögurra milljóna króna sekt.

Hér fyrir ofan má sjá atvikið.

Mathieu van der Poel er áfram í gulu treyjunni eftir fimm keppnisleiðir en ríkjandi meistari, Tadej Pogacar, átti mjög góðan dag og náði henni næstum því af honum.