Víkingur í úrslit alþjóðlegrar barþjónakeppni

Er þetta mikil viðurkenning fyrir íslenska barþjónamenningu enda hörð keppni um allan heim að komast í lokakeppnina. Víkingur er fyrsti íslenski barþjónninn til þess að komast í úrslit keppninnar. 

39 keppendur sem allir unnu sína heimamarkaði kepptu í lokakeppni Bacardi Legacy síðustu tvo daga og óhætt að segja að þetta var hörð keppni um plássinn í úrslitin. 

„Víkingur hefur unnið vel að þessari för síðan hann vann keppnina fyrst hér á landi og barðist svo á móti Finnlandi um sætið í lokakeppninni. Bakvið þessa ferð hafa farið hundruð klukkustunda hjá Víkingi við að kynna drykk sinn og Bacardi Legacy, allt sem hann hefur gert með mikilli prýði og öðrum barþjónum til fyrirmyndar,“ segir í tilkynningu um þátttöku Víkings í keppninni. 

Barþjónar sem ná að keppa í alþjóðlegu keppninni eru oftast eftirsóttir í verkefni um allan heim og mun þetta því hugsanlega vera stór stökkpallur fyrir Víking í hans starfi. Lokakeppnin fer fram á miðvikudaginn í næstu viku.