Lið Guðmundar svarar Hanning og segir ummæli hans fordæmalaus

Sex þýskir landsliðsmenn leika með Melsungen sem Guðmundur Guðmundsson þjálfar. Hanning lýsti yfir áhyggjum sínum af ástandinu hjá félaginu og sagði að engir af landsliðsmönnunum hjá því hafi bætt sig síðan þeir komu þangað.

„Ég hef áhyggjur af því að hugarfarið sem er búið til innan Melsungen liðsins muni hafa slæm áhrif á gengi þýska landsliðsins. Það er áhyggjuefni að Melsungen hefur keypt til sín marga landsliðsmenn fyrir mikinn pening en hugarfar félagsins hefur ekki vaxið við það,“ sagði Bob Hanning í viðtali við Handball-world.

„Enginn af þessum leikmönnum hefur bætt sig síðan að þeir fóru til Melsungen. Í besta falli þá eru þeir staðnaðir.“ Umræddir leikmenn eru Silvio Heinevetter, Julius Kühn, Finn Lemke, Kai Häfner, Tobias Reichmann og Timo Kastening.

Axel Geerken, stjórnarmaður Melsungen, brást við ummælum Hannings og gagnrýndi þau. 

„Að háttsettur maður innan handknattleikssambandsins lýsi félagi á svona neikvæðan hátt er fordæmalaust. Ummæli Bobs Hanning eru bein árás á félagið okkar og leikmenn þess,“ sagði Geerken.

Þrátt fyrir góðan mannskap hefur Melsungen ekki gengið vel á tímabilinu. Liðið er í 6. sæti þýsku úrvalsdeildarinnar og á ekki lengur möguleika á Evrópusæti. Þá tapaði Melsungen fyrir Lemgo í úrslitaleik þýsku bikarkeppninnar.

Geerken viðurkennir að árangurinn á tímabilinu sé ekki góður og enginn hjá Melsungen sé ánægður með hann, allra síst sexmenningarnir sem Hanning gagnrýndi.

Geerken grunar að Hanning sé að búa sig undir að kenna Melsungen um mögulega slaka frammistöðu Þýskalands á Ólympíuleikunum í Tókýó. Það verður annað stórmót þýska liðsins undir stjórn Alfreðs Gíslasonar. Akureyringurinn velur þýska hópinn fyrir Ólympíuleikana á mánudaginn.

Til að auka á dramatíkina mætast Melsungen og Füchse Berlin í þýsku úrvalsdeildinni í kvöld. Arnar Freyr Arnarsson leikur með Melsungen og Elvar Örn Jónsson gengur í raðir liðsins í sumar.