Anníe Mist: Hef efast oftar um mig sjálfa á þessu tímabili en nokkurn tímann áður

Anníe Mist tryggði sig inn á heimsleikana aðeins tíu mánuðum eftir að hún eignaðist dótturina Freyju Mist sem hún fæddi í ágúst í fyrra. Anníe Mist verður búin að ljúka keppni á heimsleikunum áður en dóttir hennar heldur upp á eins árs afmælið sitt.

Það má heyra á orðum Anníe Mistar að þetta fyrsta tímabil eftir fæðinguna hefur reynst henni afar krefjandi sem gerir heimsleikasætið hennar enn meira afrek. Hún gafst hins vegar ekki upp og gerði mjög vel um síðustu helgi.

„Í júlí fer ég á mína elleftu heimsleika. Ég hef efast oftar um mig sjálfa á þessu tímabili en nokkurn tímann áður. Ég var ekki viss um hvort líkaminn minn yrði tilbúinn eða hvort að hugur minn væri klár,“ skrifaði Anníe Mist.

„Ég hef lagt á mig vinnuna í salnum en það er fjölskylda mín, vinir og liðsfélagarnir sem styðja við bakið á mér svo ég geti gert það. Ég hef aldrei áður þurft eins mikið á þeim að halda og þakka þeim mjög mikið og frá mínum hjartarótum,“ skrifaði Anníe.

„Frederik Ægidius er kletturinn minn og hann hefur alltaf trú á mér þótt að ég hafi það ekki sjálf. Foreldrarnir mínir styðja alltaf við bakið á mér,“ skrifaði Anníe og hún þakkar líka þjálfara sínum, Jami Tikkanen, sem er að fara með henni á heimsleikana í níunda skiptið.

Anníe þakkar líka æfingafélögum sínum og þeim Tönju Davíðsdóttur og Eggerti fyrir að dæma hjá henni um helgina.

„Ég vil líka þakka styrktaraðilum mínum fyrir sem setja aldrei pressu á mig en styðja við bakið á mér sama hvað kemur upp,“ skrifaði Anníe.

Anníe þakkar líka öllum fylgjendum sínum. „Allt í lagi. Nú er komið nóg af því að vera tilfinningasöm. Nú er bara að bretta upp ermarnar og fara að æfa sig fyrir úrslitin,“ skrifaði Anníe Mist.