Kristján Einar sýknaður af á­kæru um líkams­á­rás

 Málið er gamalt, frá árinu 2016, en lögmaður Kristjáns segir í samtal við Vísi að það sé „fáránlegt þegar fólk þarf að bíða eftir niðurstöðu í fjögur ár“ í máli sem þessu.

Kristján játaði á sig fíkni­efna­laga­brot og vopna­laga­brot fyrir héraðs­dómi. Þau mál eru frá 2016 og 2017.

Kristján neitaði þó sök í líkams­á­rásar­málinu en hann var sak­felldur í héraðs­dómi fyrir að hafa ýtt konu þannig hún féll í jörðina og hand­leggs­brotnaði.

Málinu var á­frýjað til Lands­réttar sem kvað upp dóm sinn í dag. Að mati Lands­réttar hafði á­kæru­valdinu ekki tekist að færa sönnur á að Kristján Einar hafði haft á­setning til líkams­á­rásarinnar. Hann var því sýknaður af málinu.

Bæði konunni og vitnum af málinu bar saman um að hún hafi stigið í veg fyrir Kristján þegar hann var á hlaupum um­rædda nótt í októ­ber 2016. Konan sagði einnig í vitnis­burði sínum að hann hefði sveigt frá henni um leið og hann ýtti henni.

„Ekki er fullt sam­ræmi í fram­burði brota­þola og vitnanna tveggja um það hvernig á­kærði á að hafa ýtt henni en jafn­vel þótt fram­burður þeirra fyrir héraðs­dómi yrði lagður til grund­vallar um það at­riði, gegn neitun á­kærða, verður ekki litið fram hjá því sem fyrr greinir að brota­þoli fór í veg fyrir á­kærða sem þá var á hlaupum og að hann sveigði frá henni,“ segir í dómi Lands­réttar. Hann var því sýknaður af á­kærunni um líkams­á­rás.

Óboðlegt að bíða í fjögur ár

Lög­maður Kristjáns Einars, Ómar R. Valdimars­son, segir niður­stöðuna miklar gleði­fréttir: „Þetta mál er búið að vera í kerfinu í meira en fjögur ár. Það er frá­leitt þegar fólk þarf að bíða eftir niður­stöðu í fjögur ár sér­stak­lega í svona máli og þegar það hangir yfir því svona röng sak­felling úr héraði,“ segir hann.

Kristján Einar og Svala Björg­vins tjáðu sig um dóms­málið í desember í fyrra eftir að DV hafði greint frá því. Kristján sagðist þá eiga sína for­tíð sem væri að hluta ó­upp­gerð:

„Ég hef mark­visst unnið í sjálfum mér og náð árangri. Ég er ekki kominn á leiðar­enda, tek að­eins einn dag í einu. Ég hlaut á síðasta ári dóm. Ég undi ekki niður­stöðu þess dóms og hef á­frýjað niður­stöðu hans til Lands­réttar. Þeirrar niður­stöðu bíð ég.“

Hann sagði málið engar fréttir fyrir kærustu sinni eða fjöl­skyldu hennar. Svala tjáði sig einnig um málið á sínum tíma:

„Mér var kennt í æsku að trúa á það góða í fólki og dæma ekki. Og þegar fólk hefur verið á mjög slæmum stað í lífinu þá gerir fólk mis­tök sem ekki er hægt að taka til baka. En þegar fólk snýr blaðinu við og gerir allt í sínu valdi til að bæta upp fyrir for­tíðina og verða besta út­gáfan af sjálfum sér þá á það hrós skilið.“