Vill fá Tiger Woods með sér

Það er ekki enn ljóst hvort að Tiger geti verið á staðnum en það er augljóst að fyrirliðinn vill hafa hann með sér.

Steve Stricker ræddi Tiger Woods og hlutverk hans í haust á blaðamannafundi fyrir PGA meistaramótið í golfi sem hefst í dag.

„Ég hef talað við hann. Ég veit samt ekki hvort við séum komnir svo langt að hann sé tilbúinn að staðfesta að hann verði þar,“ sagði Steve Stricker.

„Það er enn mikið í gangi hjá honum en hann var léttur í lundu þegar ég ræddi við hann síðast. Við ræddum saman á Zoom í síðustu viku og það er eins og hann sé á betri stað. Hann á samt langa leið fyrir höndum,“ sagði Stricker.

„Ég myndi elska það að hafa hann þarna. Hver vildi það ekki? Strákarnir bera mikla virðingu fyrir honum og hann stóð sig frábærlega sem fyrirliði Forsetabikarsliðsins árið 2019. Hann var líka aðstoðarmaður minn á Forsetabikarnum 2017 og stóð sig þá ótrúlega vel,“ sagði Stricker.

„Hann er tilbúinn að gera allt fyrir þig og hann er í þessu af fullum hug. Svo mikið að oftast er hann mættur of snemma og farinn of seint. Þá þarf maður stundum að segja við hann. Heyrðu við eigum eftir nokkra mánuði í þessu,“ sagði Stricker.

„Tiger er mjög góður aðstoðarmaður og ég væri heldur betur til í að hafa hann með mér ef það væri mögulegt,“ sagði Steve Stricker.

Tiger Woods er eins og flestir vita að jafna sig eftir bílslys 23. febrúar síðastliðinn þar sem hann mölbraut á sér hægri fótinn og fór illa með ökklann.

Það hefur lítið heyrst um endurhæfingu Tigers nema þá helst í gegnum kylfingana Rory McIlroy, Justin Thomas og Rickie Fowler sem hafa allir fengið að heimsækja hann. Woods hefur einnig birt eina mynd af sér á hækjum.