Sjáðu lokakaflann ótrúlega í leik KA og Vals

Valur var allan tímann með frumkvæðið í leiknum í KA-heimilinu í gær, var 10-13 yfir í hálfleik og þegar fimm og hálf mínúta var eftir kom Finnur Ingi Stefánsson gestunum sex mörkum yfir, 20-26.

KA-menn svöruðu með þremur mörkum í röð en Arnór Snær Óskarsson virtist hafa slökkt vonarneista þeirra þegar hann kom Valsmönnum í 23-27 þegar þrjár mínútur voru eftir. En þá hófst ótrúleg atburðarrás.

KA fékk vítakast þegar um tvær og hálf mínúta var eftir sem Árni Bragi Eyjólfsson skoraði úr og Magnús Óli Magnússon var rekinn af velli. Snorri Steinn Guðjónsson, þjálfari Vals, tók þá leikhlé. Honum fannst það reyndar ganga full hægt í gegn að fá leikhléið og barði í ritaraborðið. Eftir leikhléið fékk Snorri Steinn tveggja mínútna brottvísun og Valsmenn því tveimur færri.

Alexander Örn Júlíusson átti misheppnað skot í næstu sókn Vals og Jóhann Geir Sævarsson minnkaði muninn í 25-27. Alexander tapaði svo boltanum og Árni Bragi minnkaði muninn í eitt mark, 26-27, úr víti þegar 53 sekúndur voru eftir. Fyrst var dæmdur ruðningur á Allan Norðberg sem fór inn úr hægra horninu en dómnum var svo breytt í vítakast.

Valsmenn fóru sér engu óðslega í síðustu sókn sinni og þegar fimmtán sekúndur voru til leiksloka var dæmd leiktöf á þá. KA-menn drifu sig fram og Sigþór Gunnar Jónsson jafnaði í 27-27 þegar sex sekúndur voru eftir. Það urðu úrslit leiksins og KA-menn fögnuðu stiginu innilega.

Valsmenn voru afar ósáttir við dómgæslu þeirra Bjarka Bóassonar og Gunnars Óla Gústafssonar og Stiven Tobar Valencia fékk rautt spjald eftir leik fyrir mótmæli. Anton Rúnarsson átti einnig erfitt með að leyna óánægju sinni.

Í myndbandinu hér fyrir neðan má sjá síðustu fimm og hálfu mínútu leiksins auk viðtala við Snorra Stein og Jónatan Magnússon, þjálfara KA.

Eftir leikinn sagðist Snorri Steinn hafa gert mistök sem urðu til þess að Valur landaði ekki sigrinum.

„Þetta var mér að kenna. Tvær mínútur á bekkinn og ég tek það á mig. Ég tek þetta tapaða stig á mig. Ég tók leikhlé og hann var mjög lengi að flauta leikhléið. Ég var ósáttur við það og brást of harkalega við,“ sagði Snorri Steinn.

„Það eru skrítnir dómar og við erum tveimur færri. Við hefðum klárlega getað gert betur og það er lélegt að missa þetta niður en ég er mjög ánægður og gríðarlega stoltur af strákunum. Það er búið að vera erfitt hjá okkur. Við höfum verið gagnrýndir og það var allt annað að sjá liðið í dag.“

Valur hefur aðeins unnið tvo af sex leikjum sínum eftir að keppni hófst á ný eftir hléið langa og er í 6. sæti Olís-deildarinnar með ellefu stig. KA er í 8. sætinu með tíu stig en á leik til góða.

Með því að smella hér má sjá myndasyrpu Skapta Hallgrímssonar á Akureyri.net úr leiknum í KA-heimilinu í gær.

Farið verður yfir leik KA og Vals og alla dramatíkina á lokakaflanum í Seinni bylgjunni á Stöð 2 Sport klukkan 21:15 í kvöld.

Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.