Fór heim í fússi eftir að Mourinho tók hann af velli í hálfleik

Roberto Firmino kom Liverpool í 0-1 með marki í uppbótartíma fyrri hálfleiks eftir mistök í vörn Tottenham.

Mikið gekk á í búningsklefa Tottenham í hálfleiknum þegar mistökin í markinu voru rædd. Á endanum ákvað Jose Mourinho, knattspyrnustjóri Spurs, að taka Aurier af velli.

Fílbeinsstrendingurinn var langt frá því að vera sáttur með þá ákvörðun og í stað þess að horfa á seinni hálfleikinn á hliðarlínunni fór hann heim til sín.

Harry Kane fór einnig af velli í hálfleik eftir að hafa meiðst á báðum ökklum að sögn Mourinhos. Ekki liggur fyrir hversu lengi hann verður frá vegna meiðslanna.

Tottneham er í 6. sæti ensku úrvalsdeildarinnar með 33 stig, fjórum stigum frá sæti í Meistaradeild Evrópu.