Lárus Helgi: Þetta er skemmtilegasti leikur sem ég hefi spilað lengi

Lárus Helgi var með 17 skot varin í leiknum þar af aðeins fimm skot í fyrri hálfleik. Hann lokaði síðan markinu í síðari hálfleik og endaði með tæp 45% markvörslu. Fór það svo að Fram vann nágranna sína í Val 26-22.

„Ég er bara í sjöunda himni hérna, þetta var geggjaður leikur hjá okkur í kvöld frá A-Ö. Ég er bara hrikalega ánægður með þessi tvö stig“

„Okkur fannst við eiga aðeins inni frá síðasta leik“ sagði Lárus en þar var hann sjálfur hins vegar í kringum 60% markvörslu gegn ÍBV þar sem aðrir í liðinu áttu ekki eins góðan leik.

„Sóknarleikurinn var bara allt annar í dag en í síðasta leik. Það var miklu meira flæði, við mættum boltanum og voru virkilega góðir sóknarlega“

Valur sat í efsta sæti deildarinnar fyrir leikinn í kvöld á meðan Fram hafði aðeins unnið einn leik á tímabilinu og það gegn botnliði ÍR. Lárus segir að þeirra frammistaða hafi ekki komið honum á óvart í leiknum.

„Við förum í alla leiki til að vinna þá, það er engin spurning. Við ætlum að verja heimavöllinn okkar með kjafti og klóm. Það er alveg sama hver kemur hingað, hann þarf að hafa fyrir öllu sem hann ætlar sér að taka héðan“ sagði Lárus og bendir þar á að Safamýrin verði liðum deildarinnar erfið á þessu tímabili.

Lárus kemur vel undan Covid pásunni, með 50% markvörslu að meðaltali í fyrstu tveimur leikjunum.

„Maður allavega reynir, ég þarf að leggja aðeins í púkkið líka“ sagði Lárus hógvær að lokum.