Tveir leikir í League of Legends

Það styttist óðum í lok deildarinnar. Áður en við kynnum leiki kvöldsins skulum við fara aðeins yfir skipulagið sjálft. Núna er fimmta vikan af alls sjö þar sem þessi 8 bestu lið landsins keppa. Að þeim loknum fylgja þrjú mót:

1. Opna mótið sem er opið öllum sem vilja taka þátt.

2. Áskorendamótið - fjögur efstu liðin úr opna mótinu ásamt fjórum neðstu liðunum úr deildinni.

3. Meistaramótið - úrslitin sjálf þar sem fjögur efstu liðin úr deildinni keppa við fjögur efstu lið áskorendamótsins.

Deildin skiptir líka máli upp á næsta tímabil því að neðsta liðið í deildinni dettur sjálfkrafa út en næst neðsta þarf að spila við neðri deild upp á að halda sætinu. Við nefnum þetta vegna þess að í kvöld sjáum við tvær viðureignir, annars vegar Somnio Esports gegn Fylkir Esports klukkan 20:00 og svo FH eSports gegn XY.esports strax í kjölfarið.

FH og Fylkir deila fimmta sæti en Somnio og XY eru enn stigalaus og sitja á botninum. FH og Fylki vantar þessi tvö stig til að jafna KR um fjórða sætið í keppninni um að gulltryggja sig í meistaramótið en Somnio og XY eru hreinlega að keppast um að haldast áfram inni í deildinni.

Það verður því hörkuslagur í kvöld því liðin eiga eftir að koma glorhungruð inn.

Hægt er að fylgjast með viðureignunum hér að neðan.