Dag­skráin í dag: Hjör­var og Freyr mæta til Gumma, Goð­sagnir og frá­bærir ís­lenskir kapp­leikir

Beinum útsendingu frá íþróttaviðburðum hefur snarfækkað vegna útbreiðslu kórónuveirunnar eins og gefur að skilja. Til að mæta því hafa Stöð 2 Sport og hliðarrásir verið dagskrársettar með nýju dagskrárefni og endursýningum af safnefni til að stytta íþróttaþyrstum stundirnar.

Í Sportinu í kvöld munu þeir Hjörvar Hafliðason og Freyr Alexandersson mæta til Gumma Ben og fara yfir heima og geima í fótboltaheiminum; bæði hérlendis sem og erlendis. Á sportinu í dag má einnig finna frábæran leik Keflavíkur og KR í Dominos-deild karla árið 2011 sem og aðra flotta fótboltaleiki, bæði hér á landi sem og í ensku deildinni og Meistaradeildinni.

Stöð 2 Sport 2

Dagurinn byrjar með þremur þáttum af Goðsögnum þar sem er fjallað um knattspyrnuhetjurnar Inga Björn Albertsson, Ragnar Margeirsson og Pétur Ormslev. Þar tekur svo við úrslitasería KR og ÍR í Dominos-deild karla á síðustu leiktíð en er líða fer á daginn eru svo síðustu sex þættirnar í Goðsagnaseríunni.

Stöð 2 Sport 3

Körfubolti, körfubolti og meiri körfubolti á Stöð 2 Sport 3 í dag. Úrslitaeinvígi Keflavíkur og Snæfells í Dominos-deild kvenna árið 2017 og því verður fylgt eftir með úrslitaeinvíginu 2018 sem og þriðja leiknum í úrslitaeinvíginu 2019.

Stöð 2 eSport

Íslandsmóti í eFótbolta fór fram um helgina en á Stöð 2 eSport má meðal annars finna útsendingu frá undanúrslita- og úrslitaleiknum. Einnig má finna útsendingar frá Vodafone-deildinni sem og uppgjörsþátt deildarinnar.

Stöð 2 Golf

Golfþáttur þar sem besti kylfingur Íslands, Birgir Leifur Hafþórsson, tekur fyrir allt sem tengist golfi og nýtist kylfingum á öllum stigum leiksins verður á dagskránni í dag en alls verða sýndir tólf þættir svo golfunnendur geta verið límdir við skjáinn í dag.

Alla dagskrá dagsins má finna hér.