Lemstrað lið Liverpool átti ekki í neinum vandræðum með Leicester í toppslag ensku úrvalsdeildarinnar á Anfield í kvöld.
Það var reyndar Jonny Evans, varnarmaður Leicester, sem kom Liverpool á bragðið þegar hann skallaði hornspyrnu Andrew Robertson í eigið net. Skelfileg mistök hjá þessum reynda varnarmanni.
Hinn sjóðheiti Diogo Jota tvöfaldaði forystu Liverpool skömmu fyrir leikhlé.
Liverpool hafði mikla yfirburði í leiknum en þurfti að bíða þar til á 86.mínútu eftir þriðja markinu.
Það gerði Roberto Firmino þegar hann skallaði hornspyrnu James Milner í netið.
Afar sannfærandi sigur meistaranna sem eru í 2.sæti deildarinnar með 20 stig, líkt og topplið deildarinnar, Tottenham.
