Áfall fyrir „litla og saklausa borg“

Enn sem komið er bendir ekkert í rannsókn lögreglu til þess að fleiri en einn hafi verið að verki þegar skotárás var gerð á sex stöðum í Vín í gær að sögn Karls Nehammer, innanríkisráðherra. Fjórir fórust í árásinni en lögregla leitaði mögulegra vitorðsmanna í dag.

Nokkur vitni hafa þó sagst séð fleiri árásarmenn í gærkvöldi. Innanríkisráðherrann sagðist ekki geta útilokað með öllu að fleiri hafi ekki komið að hryðjuverkunum því lögregluyfirvöld eigi eftir að yfirfara um fimmtíu prósent af myndefni sem þeim hefur borist frá vettvangi árásanna.

Íbúum Vínarborgar var sagt að halda sig innandyra í dag á meðan rannsóknin stæði yfir. Lögregla hefur ráðist í húsleit á fjórtán stöðum og handtekið fleiri en tíu.

Sautján særðust í árásunum, þar af sjö lífshættulega. Lögreglan skaut árásarmanninn til bana, tuttugu ára karlmann sem losnaði úr fangelsi í desember. Í tilkynningu er honum lýst sem hryðjuverkamanni en hann fékk dóm í apríl fyrir að hafa reynt að komast til Sýrlands og ganga til liðs við hryðjuverkasamtökin sem kenna sig við íslamskt ríki.

Hjónin Elma Stefanía Ágústsdóttir og Mikael Torfason eru búsett í Vín og eiga heima steinsnar frá vettvangi árásanna. Elma Stefanía er leikkona við Burgleikhúsið í Vínarborg og Mikael fæst við ritstörf. Elma Stefanía lýsti andrúmsloftinu í borginni í skugga voðaverkanna.

„Það er mikill ótti og óöryggi. Vín hefur verið þekkt fyrir að vera örugg. Hún hefur oft verið á lista yfir öruggustu borgir í heimi þannig að þetta kemur manni á óvart. Persónulega hef ég verið örugg hérna þannig að það er áfall þegar svona gerist.“

Elma Stefanía og Mikael voru heima hjá sér þegar voðaverkin áttu sér stað.

„Fljótlega eftir að okkur bárust fréttir af þessu þá heyrðum við í lögreglubílum og þyrlum fljúga hérna yfir. Það hefur greinilega verið mikill viðbúnaður. Við höfðum nú vit á að vera ekkert að fara út þannig að við vorum bara inni og fylgdumst með þessu í fréttum,“ sagði Mikael en Elma Stefanía tók við.

„Já, ég ætlaði nú út með ruslið og fattaði bara að ég þorði ekki“.

Austurríkismönnum hefur verið tíðrætt um ótta í dag en kanslari Austurríkis, Sebastian Kurz, sagði voðaverkin í gær vera árás á frjálst samfélag. Mikael sagði hryðjuverkin áfall fyrir Austurríkismenn, og sér í lagi íbúa Vínarborgar.  Þrátt fyrir að vera stórborg sé Vín á sinn hátt „lítil og saklaus“.  Fólk upplifi sig öruggt í henni.

Elma Stefanía segir eðlilegt að fyllast ótta svo skömmu eftir árás en þó mikilvægt, þegar fram líða stundir, að gefa sig ekki óttanum á vald nú í skugga ógnvekjandi atburða eins og hryðjuverka og heimsfaraldurs.

„Þótt þeir veki ótta og óöryggi í fyrstu þá hafa þeir samt þau áhrif að við hristum upp í gildum okkar og því sem skiptir okkur máli, og gerir okkur, kannski, eftir allt saman sterkari sem manneskjur og sem hópur“.