Tíu mega koma saman, krár og skemmtistaðir loka og íþróttastarf leggst af

Samkomutakmarkanir verða hertar þannig að leyfilegur fjöldi sem saman má koma fer úr tuttugu manns niður í tíu manns. Hertar aðgerðir taka gildi strax á miðnætti og gilda á öllu landinu

Þetta kom fram í máli Svandísar Svavarsdóttur heilbrigðisráðherra þar sem hún kynnti hertari aðgerðir vegna kórónuveirufaraldursins.

„Þetta er það sem okkar allra besta fólk telur að dugi til að snúa veiruna niður í þessari lotu.  En þetta virkar bara ef við snúum bökum saman, sýnum samstöðu og förum eftir reglunum,“ segir Svandís.

Á fundinum greindi hún frá því að tveggja metra reglan verði áfram í gildi, grímuskylda verði aukin. Sundlaugar verði lokaður, íþróttastarf leggist af í bili. 

Þá þurfa krár og skemmtistaðir að hafa lokað og veitingastaðir að loka klukkan níu.

Greindi hún einnig frá því að börn fædd á árinu 2015 og síðar séu undanþegin reglum um fjöldatakmarkanir, tveggja metra reglu og grímuskyldu.

Gildir til og með 17. nóvember

Gert er ráð fyrir að reglur um hertar aðgerðir gildi til og með 17. nóvember. Þær verða endurmetnar eftir aðstæðum með hliðsjón af því hvort hægt verði að aflétta þeim fyrr, eða hvort framlenging sé nauðsynleg.

Svandís ræddi breytingarnar nánar að loknum fundi.

„Landspítalinn sem er okkar flaggskip er á neyðarstigi og víða í heilbrigðiskerfinu er álag. Meira um veikindi í farsóttarhúsum en áður. Það er ekki ráðrúm til þess núna að bíða og sjá til, að vona það besta, heldur kynnum við nú aðgerðir sem taka gildi strax á miðnætti.

Takmörkum samskipti, hittum eins fáa og við getum, höldum tveggja metra reglunni, notum andlitsgrímur og þvoum hendur og sprittum,“ segir Svandís.

Helstu aðgerðir eru eftirfarandi:

• 10 manna fjöldatakmörk meginregla. - Heimild fyrir 30 manns í útförum en 10 að hámarki í erfidrykkjum.
• 50 manna hámarksfjöldi í lyfja- og matvöruverslunum en reglur um aukinn fjölda með hliðsjón af stærð húsnæðisins. - Fjöldatakmarkanir gilda ekki um almenningssamgöngur, hópbifreiðar, innanlandsflug eða störf viðbragðsaðila.
• Fjöldatakmarkanir gilda ekki um störf ríkisstjórnar, ríkisráðs, Alþingis og dómstóla.
• 10 manna fjöldatakmörk eiga ekki við þegar fleiri búa á sama heimili.
• Íþróttir óheimilar.
• Sundlaugum lokað.
• Sviðslistir óheimilar.
• Krám og skemmtistöðum lokað.
• Veitingastaðir með vínveitingaleyfi mega ekki hafa opið lengur en til 21.00.
• Grímuskylda þar sem ekki er unnt að tryggja 2 metra nálægðarmörk milli einstaklinga sem ekki eru í nánum tengslum.
• Börn fædd 2015 og síðar undanþegin 2 metra reglu, fjöldamörkum og grímuskyldu (gilti áður um börn fædd 2005 og síðar).

Undanþáguheimildir:

• Ráðherra getur veitt undanþágu frá takmörkunum vegna félagslega ómissandi innviða sem mega ekki stöðvast. Þar undir fellur m.a. heilbrigðisstarfsemi og félagsþjónusta.
• Ráðherra getur veitt undanþágu við banni frá íþróttastarfi fyrir einstaka viðburði, til dæmis alþjóðlegra keppnisleikja.

Ný reglugerð um takmarkanir á skólastarfi verður kynnt á blaðamannafundi menntamálaráðherra á sunnudaginn.

Þá sagði Þórólfur Guðnason sóttvarnalæknir að vonandi muni aðgerðirnar skila árangri á einni til tveimur vikum. En þá þurfi allir að taka þátt.