Davíð segir að hann hefði gert það sama og Ólafur Ingi en Sigurvin fannst hann heldur dramatískur

Atvikið í leik KR og Fylkis á Meistaravöllum á sunnudaginn var að sjálfsögðu til umræðu í Pepsi Max stúkunni í gær.

Sam Hewson skoraði sigurmark Fylkis úr vítaspyrnu í uppbótartíma sem dæmd var á Beiti Ólafsson, markvörð KR, fyrir að slæma hendi í Ólaf Inga Skúlason, spilandi aðstoðarþjálfara Fylkis. Auk þess að fá dæmda á sig vítaspyrnu var Beitir rekinn af velli. Fylkir vann leikinn, 1-2.

Davíð Þór Viðarsson sagði að Ívar Orri Kristjánsson, dómari leiksins á sunnudaginn, hafi tekið rétta ákvörðun með því að dæma víti og reka Beiti af velli.

„Óli er að trufla hann og mér sýnist þetta fara í taugarnar á Beiti og hann slengir höndinni í hann. Ég held að Óli sé ekkert stórslasaður eftir þetta. Mér finnst ekkert annað í stöðunni en að dæma víti og rautt spjald. Mér finnst Beitir gera mistök og þarna í smá tíma missa stjórn á skapi sínu,“ sagði Davíð í Pepsi Max stúkunni í gær. Hann sagði að hann hefði gert nákvæmlega það sama og Ólafur Ingi í þessari stöðu.

„Það er gömul saga og ný að þú þarft stundum að gera aðeins meira úr hlutunum til að fá eitthvað fyrir þinn snúð. Maður getur ekki mælt hversu þungt þetta högg var en hann fær vissulega höndina í andlitið. Ég get bara viðurkennt það hérna í beinni að ég hefði farið niður þarna.“

Eftir leikinn á sunnudaginn gagnrýndi Rúnar Kristinsson, þjálfari KR, Ólaf Inga harðlega og sakaði hann um leikaraskap. Ólafur Ingi var svo í viðtali í Sportpakkanum í gær þar sem hann sagði Rúnar hafa farið yfir strikið með ummælum sínum og málið hefði haft áhrif á fjölskyldu sína.

„Þetta er áhugavert. Ég ætla ekki að vera of kaldur en mér finnst þetta heldur dramatískt. En ég hef svo sem ekki lent í þessu. Ég veit ekki af hverju Rúnar ætti að hringja í konuna hans en auðvitað er það rétt að menn þurfa að gæta sín hvað þeir segja,“ sagði Sigurvin Ólafsson um viðtalið við Ólaf Inga.

Davíð segir að viðtölin við Rúnar eftir leikinn á Meistaravöllum á sunnudaginn hafi verið úr karakter.

„Í öllum viðtölum sem ég hef við Rúnar hefur mér fundist hann ótrúlega yfirvegaður og koma hlutunum ótrúlega vel frá sér,“ sagði Davíð.

„Auðvitað er ekkert auðvelt að koma í viðtal og halda kúlinu og ró sinni en auðvitað hefði Rúnar átt sleppa því að segja þetta og sleppa því að tala um svindl og svínarí því það er ekkert óeðlilegt við að hann [Ólafur Ingi] hafi farið niður þarna. Það þarf bara að klára þetta mál. Ólafur Ingi spilar á grensunni og hefur byggt sinn feril á því og hann er ekkert að fara að breyta því. En Óli er enginn svindlari.“