Allir leikir íslenska handboltalandsliðsins eftir kvöldmat

Leikir íslenska handboltalandsliðsins á HM í handbolta í Egyptalandi á næsta ári hafa nú fengið leikstað, dagsetningu og tímasetningu.

Íslenska landsliðið spilar alla þrjá leiki sína í riðlinum eftir kvöldmat eða klukkan 19.30 á íslenskum tíma. Leikirnir eru seint á staðartíma eða klukkan 21.30.

Ísland á því seinni leikinn öll kvöldin.

Ísland er í F riðli með Portúgal, Túnis og Alsír en riðilinn verður leikinn í The New Capital Sport Hall í útjaðri Kaíró.

Fyrsti leikurinn er við Portúgal fimmtudaginn 14. janúar en Ísland verður þá nýbúið að mæta Portúgal í tveimur leikjum í undankeppni EM 2022.

Komist Ísland í milliriðil mótsins mun liðið færa sig um set og spila í 6th of October Sport Hall í milliriðli.