„Æfum líklega Counter-Strike meira en CrossFit“

Eftir brösuga byrjun á tímabilinu sigraði XY Exile, 16-11, í Vodafone-deildinni í fyrradag. Gísli Geir Gíslason (Triple G) var valinn maður leiksins.

„Þetta var langþráður sigur því við eigum að vera komnir með þrjá sigra núna. Við töpuðum þessum Þórsleik þannig það var gott að fá þennan sigur,“ sagði Gísli í samtali við Vísi í gær.

„Við mættum ákveðnari en við höfum gert hingað til. Við vorum tilbúnir. Leikplanið var ekkert öðruvísi en áður en meira gekk upp hjá okkur sem einstaklingum.“

XY nýtti sér heimavallaréttinn vel í fyrradag en hann er nýlunda í Vodafone-deildinni. 

„Við vorum með heimavallarétt og fengum að spila kort sem okkur finnst þægilegt. Og þetta fór vel,“ sagði Gísli sem var ekki hrifinn af þessari breytingu, allavega fyrst í stað.

„Ég var ekki hrifinn af þessu til að byrja með en var tilbúinn að gefa þessu séns. Svo sjáum við hvernig fer eftir tímabilið, hvort maður sé sáttur með þetta eða ekki.“

XY er í 6. sæti Vodafone-deildarinnar en Gísli og félagar stefna hærra. „Við ætlum okkur topp fjögur sæti. Það er nóg eftir af tímabilinu og allt getur gerst,“ sagði hann.

XY er samstarfi við samnefnda CrossFit stöð og samnýta aðstöðu með henni.

„Æfingaaðstaðan okkar er þar. Ég þjálfa krakka þar og akademíuliðið okkar,“ sagði Gísli.

En hvort eru Gísli og félagar hans duglegri að kíkja á Counter-Strike-æfingu eða CrossFit-æfingu?

„Við æfum líklega Counter-Strike meira en CrossFit,“ svaraði Gísli hlæjandi. Hann segir að krakkarnir sem hann þjálfar séu duglegir að stunda CrossFit.

„Það eru tíu krakkar í Counter-Strike hóp og tíu krakkar í Fortnite hóp sem ég þjálfa tvisvar í viku. Þau fara svo tvisvar í viku á CrossFit æfingu,“ sagði Gísli að lokum.