Rússinn dansandi sem má loksins keppa á heimsleikunum í CrossFit

Það eru breyttar aðstæður á heimsleikunum í ár vegna kórónuveirunnar og það gæti hentað íþróttafólkinu mismunandi vel.

Roman Khrennikov er mögulega sá sem græðir einna mest á því að heimsleikarnir fara í gegnum netið í ár. Roman Khrennikov hefur verið kallaður rússneski Break dansarinn og hefur eignast marga aðdáenda með frábærri frammistöðu hérna megina Atlantshafsins.

Tommy Marquez hjá Morning Chalk Up fór yfir það hvaða CrossFit fólk græðir mest á því að íþróttafólkið getur keppt á heimsleikunum á heimavelli í stað þess að þurfa að ferðast til Bandaríkjanna.

Fyrri hluti úrslitanna fer í gegnum netið þar sem fimm bestu karlarnir og fimm bestu konurnar tryggja sér sæti í ofurúrslitum sem fara fram í Kaliforníu fylki í Bandaríkjunum.

Morning Chalk Up segir að Rússinn Roman Khrennikov og hin ástralska Kara Saunders græði mest á því að geta keppt á heimavelli. Það eru góðar ástæður fyrir því.

Kara Saunders er eina af ástralska CrossFit fólkinu sem fær ekki leyfi til að ferðast til Bandaríkjanna vegna sóttvarnarreglna í heimalandinu. Það kemur þeim því vel að geta keppt í heimalandinu.

Kara Saunders eignaðist líka dóttur sína fyrir aðeins sextán mánuðum sínum og það er einnig flókið mál að ferðast með smábarn yfir hálfan hnöttinn.

Kara Saunders getur nú vonandi keppt á heimsleikunum án þess að þurfa að fara frá barninu sínu. Hver dagur sem hún fær í viðbót í endurkomu sinni (kallar það momback en ekki comeback) nýtist henni einnig vel í staðinn fyrir að eyða þeim í löng ferðalög og að venjast tímamismun í Bandaríkjunum.

Kara Saunders komst á verðlaunapallinn á Rogue Invitational mótinu í sumar og það þrátt fyrir að þurfa að keppa um miðja nótt. Hún er því líkleg til að nýta sér vel þessar aðstæður.

Rússinn Roman Khrennikov græðir síðan án efa mest af þvi af karlkeppendunum að heimsleikarnir fari nú fram í gegnum netið.

Það eru margir búnir að bíða lengi eftir því að sjá Roman Khrennikov keppa á heimsleikunum. Hann hefur hingað til ekki getað fengið að keppa í Bandaríkjunum og það þýðir engir heimsleikar til þessa.

Roman Khrennikov hefur samt skapað sér nafn með því að vinna Evrópumeistaratitil og rússneska meistaramótið. Hann vann líka CrossFit Italian Showdown mótið og hefur oft komið sér á pall á Sanctional mótum.

Það eina sem vantar á ferilskrána er að keppa á heimsleikunum. Khrennikov hefur unnið sér þátttökurétt á heimsleikunum undanfarin þrjú ár en hefur hingað til ekki tekist að fá vegabréfsáritun til Bandaríkjanna til að keppa.

Nú þarf Roman Khrennikov ekki að ferðast til Bandaríkjanna til að keppa á heimsleikunum heldur getur hann keppt í gegnum netið eins og aðrir.

Nái Roman Khrennikov eitt af fimm efstu sætunum sem gefa þátttökurétt í ofurúrslitunum þá eykur það örugglega líkurnar á því að hann fái loksins vegabréfsáritun til Bandaríkjanna.

Hér fyrir neðan má sjá samantektina hjá Tommy Marquez.