Ung­verjar unnu Tyrki ó­vænt | Fyrrum leik­maður FH hetja Fær­eyinga

Alls fóru tíu leikir fram í Þjóðadeildinni í fótbolta í kvöld. Ungverjaland vann óvæntan sigur á Tyrkjum ytra, þá unnu Færeyjar 3-2 sigur á Möltu. Hér að neðan má finna öll úrslit kvöldsins.

Í riðli 3 í B-deild vann Rússland 3-1 sigur á Serbíu. Staðan var markalaus í hálfleik en Artem Dzyuba kom heimamönnum yfir í upphafi síðari hálfleiks með marki úr vítaspyrnu. Vyacheslav Karavaev tvöfaldaði svo forystuna á 69. mínútu áður en Aleksandar Mitrovic minnkaði muninn tíu mínútum síðar.

Dzyuba var svo aftur á ferðinni áður en leik lauk og lokatölur því 3-1 Rússum í vil.

Í hinum leik riðilsins tryggði Dominik Szoboszlai Ungverjalandi óvæntan sigur gegn Tyrklandi ytra. Lokatölur 1-0 Ungverjum í vil.

Í riðli 1 í D-deild unnu Færeyjar góðan sigur á Möltu. Lokatölur 3-2 en Færeyingar skoruðu tvívegis undir lok leiks til að tryggja sér sigurinn. Klaemint Olsen kom Færeyjum yfir í fyrri hálfleik en Jurgen Degabriele jafnaði metin áður en flautað var til hálfleiks.

Andrei Agius kom Möltu yfir í síðari hálfleik en þeir Andreas Lava Olsen og Brandur Hendriksson – fyrrum leikmaður FH – skoruðu báðir á síðustu þremur mínútum leiksins og lokatölur því 3-2.

Mark Brands var stórglæsilegt en það kom beint úr aukaspyrnu. 

Lettland og Andorra gerðu markalaust jafntefli í hinum leik riðilsins.

Önnur úrslit kvöldsins

Búlgaría 1-1 Írland

Finnland 0-1 Wales

Moldóva 1-1 Kósovó

Slóvenía 0-0 Grikkland