Ekkert söngvatn á fjalli eða í réttum í haust

Gangnamenn eru nú að gera sig klára víða um land til að fara á fjall og smala kindum sínum. Að sögn fjallkóngs Síðumannaafréttar verða sóttvarnir í hávegum hafðar á fjalli og í réttum og söngvatn verður ekki haft um hönd eins og tíðkast hefur á fjalli og í réttum.

Það er á ábyrgð sveitarstjórna á hverjum staða að ábyrgjast að framkvæmd gangna og rétta fari fram samkvæmt reglum um sóttvarnir vegna kórónuveirunnar. Þá er öllum skylt, sem taka þátt í göngum og réttum að hlaða niður smitrakningarappi almannavarna í síma sína. Sverrir Gíslason, sauðfjárbóndi á bænum Kirkjubæjarklaustri 2 í Skaftárhreppi er fjallkóngur á Miðparti á Síðumannaafrétti en sá afréttur er þrískiptur.

„Þetta leggst bara vel í okkur og við munum reyna að haga okkur helst hefðbundið en tökum auðvitað tillit til þessarar veiru sem er á ferðinni.“

Sverrir segir að fjallmenn verði með grímur á sér og allir með spritt í göngunum og passað verður vel upp á tveggja manna regluna. Hann segir mesta breytinguna verða í réttunum sem verða haldnar laugardaginn 5. september þar sem verða um fjögur þúsund fjár. Réttirnar heita Skaftárréttir og eru við Hunkubakka.

„Ég held að almennt muni fólk ekki koma í réttir nema að eiga þangað erindi og það má skora á fólk að koma ekki í réttir þetta árið bar til þess að koma í réttir,“ segir Sverrir.

En hvernig verður með áfengispelana, munu þeir ganga á milli manna?

„Það eru nú blessunarlega þannig í Skaftárrétt, ég er nú búin að koma í þessar réttir í tuttugu ár og ég man einu sinni eftir því að hafa séð áfengispela á lofti í réttunum, þannig að það er eitthvað sem við höfum ekki miklar áhyggjur af en að sjálfsögðu er það góð og gild menning víða um landiði að menn hafa söngvatn í réttum og ég held nú að allir séu búnir að stilla það af nú þegar að þessi gamli og góði gestrisni siður að gefa mönnum snafs og öðrum af pela sínum, það mun ekki verða brúkað,“ segir Sverrir Gíslason, fjallkóngur.