Bjartsýni á Djúpavogi með endurreisn Búlandstinds

Viðsnúningur hefur orðið í atvinnumálum á Djúpavogi, íbúum fjölgar og þar ríkir nú mikil bjartsýni. Störfin í stærsta atvinnufyrirtækinu, Búlandstindi, eru núna orðin fleiri en var fyrir fimm árum, þegar tilkynnt var um lokun þess. Þetta kom fram í þættinum Um land allt og í fréttum Stöðvar 2.

Sveitarstjórinn Gauti Jóhannesson rifjar upp höggið þegar Vísir í Grindavík ákvað að loka Búlandstindi.

„Við urðum fyrir því þarna 2015 þá misstum við 90 prósent af kvótanum úr þorpinu og það var mikið áfall. Þá fækkaði okkur töluvert,“ segir Gauti. Íbúafjöldinn fór úr 470 manns niður í 420.

„Það var verið að leggja niður stærsta fyrirtækið á staðnum og þar unnu fimmtíu manns. Og auðvitað fluttu margir í burtu,“ segir Elís Hlynur Grétarsson, framkvæmdastjóri Búlandstinds ehf., sem fór fyrir endurreisn fyrirtækisins.

Anna Czeczko frá Póllandi og íslenskur eiginmaður hennar frá Djúpavogi voru meðal þeirra sem þáðu boð Vísis um vinnu í Grindavík.

„En við komum aftur hér. Það var bara betra fyrir okkur að vera hér. Við viljum vera hér,“ segir Anna.

Grunnurinn að endurreisn Djúpavogs er fiskeldið og vinnslan sem því fylgir í Búlandstindi en þar starfa núna sextíu manns. Þar er lax unninn frá tveimur laxeldisfyrirtækjum, en jafnframt er haldið áfram hefðbundinni botnfiskvinnslu. 

Ólöf Rún Stefánsdóttir, gæðastjóri hjá Fiskeldi Austfjarða, segir fiskeldið hafa stækkað mjög hratt. 

„Uppbyggingin síðasta ár er búin að vera rosaleg,“ segir Ólöf. 

Sjá einnig: Stækkun fiskeldis fyrir austan

Búlandstindur er núna í jafnri eigu þriggja aðila, tveggja laxeldisfyrirtækja; Fiskeldis Austfjarða og Laxa fiskeldis, og Ósness, sem er í hefðbundum fiskveiðum.

Breytingin sést líka á skipunum í höfninni. Þar er enginn togari lengur, í staðinn eru komnir laxeldisbátar. 

Sjá einnig: Tekist á um stóraukið laxeldi á Austfjörðum

Hlutfall barna er með því hæsta sem gerist. Núna eru íbúarnir um 480 talsins, þar af eru um 80 börn á grunnskólaaldri og um 30 á leikskólaaldri.

„Og þeim mun fjölga enn frekar næsta haust. Og það er með nýju fólki,“ segir Signý Óskarsdóttir, skólastjóri Djúpavogsskóla.

„Það var bara snúið hér vörn í sókn. Það er óhætt að segja að allir hafi lagst á eitt með það og það varð bara til alveg ofboðslegur kraftur í þessu samfélagi, sem við höfum nýtt til góðs, tel ég,“ segir Þorbjörg Sandholt aðstoðarskólastjóri.

Fjallað var um uppganginn á Djúpavogi í þættinum Um land allt á Stöð 2. Þetta var fyrri þáttur af tveimur um Djúpavog en sá seinni verður sýndur næstkomandi mánudag.

Hér má sjá frétt Stöðvar 2: