Dagurinn hefur einkennst af smáskjálftavirkni í grennd við Grindavík en frá miðnætti hafa rúmlega fimmtíu sjálftar mælst á svæðinu, flestir undir tveimur að stærð. Frá 21. janúar hafa 1300 skjálftar mælst á svæðinu.
Frá þessu greinir vakthafandi jarðvísindamaður á Veðurstofunni.
Nýjustu gögn úr GPS mælum sýna áframhaldandi landris á svæðinu vestan við Þorbjörn. Í heildina hefur land risið um fimm sentímetra frá 20. janúar og þá sýna gervitunglamyndir sömu þróun.
Samhliða landrisinu má búast við áframhaldandi skjálftavirkni.
Vakthafandi jarðvísindamaður segir að líklegasta skýring þessarar virkni sé kvikuinnskot á 3-9 km dýpi rétt vestan við Þorbjörn. Ólíklegt er talið að til eldgoss komi.
Næsti fundur vísindaráðs Almannavarna verður haldinn á fimmtudag þar sem staðan verður metin.
Land risið um fimm sentímetra og áframhaldandi smáskjálftavirkni
Tengdar fréttir
Líkir jarðhræringunum við Grindavík við það að troða bók í miðjan bókastafla
Töluverð jarðskjálftavirkni hefur verið við Grindavík síðustu daga og er kvikuinnskot talin líklegasta skýringin á jarðhræringunum. Jarðeðlisfræðingur líkir innskotinu og áhrifum af því við það að troða bók í miðjan bókastafla.
Þrjátíu skjálftar frá miðnætti
Áfram hafa mælst skjálftar í grennd við Grindavík og einkenndist nóttin af smáskjálftavirkni.
Nýtt myndband sýnir greinilega hvernig skjálftavirknin jókst
Nýtt myndband frá Veðurstofu Íslands sýnir greinilega hvernig skjálftavirknin nærri Grindavík jókst tímabundið síðastliðið föstudagskvöld.
