Treystir á að landsliðsþjálfararnir séu að fylgjast með

Hægri bakvörðurinn Alfons Sampsted og liðsfélagar hans í Bodø/Glimt tróna á toppi norsku úrvalsdeildarinnar. Alfons vonast til að landsliðsþjálfararnir Erik Hamrén og Freyr Alexandersson séu að fylgjast með framgöngu hans í norsku úrvalsdeildinni.

Alfons var í viðtali við Fótbolti.net þar sem þetta kemur fram. Þar fer hann yfir gott gengi Bodø/Glimt á leiktíðinni en gengi liðsins kemur honum ekki á óvart. Liðið lenti í 2. sæti á síðustu leiktíð og er sem stendur einu jafntefli frá fullu húsi stiga eftir ellefu umferðir í Noregi.

„Nei, það kemur ekki á óvart. Við höfum verið að vinna með ákveðna hugmyndafræði sem við fundum frekar snemma að gekk upp. Þegar hún gengur upp er ekkert mál að hafa trú á því að sigur vinnist í hverjum leik,“ sagði Alfons í viðtalinu.

Alfons hefur leikið tvo leiki með íslenska A-landsliðinu, báða í janúar, og vonast eftir frekari tækifærum í komandi leikjum.

„Þegar ég var með hópnum í janúar þá segja [Erik] Hamrén [landsliðsþjálfari] og Freyr [Alexandersson, aðstoðarþjálfari] að þeir horfi til félagsliðanna. Það er akkúrat það sem ég einbeiti mér að núna. Ef ég stend mig vel hér þá treysti ég því að þeir séu allavega að horfa. Ef að þeir hafa trú á því að ég geti komið inn þá er ég klár,“ sagði Alfons að lokum.

Alfons á 25 leiki í efstu deild hér á landi en hann hefur einnig leikið sem atvinnumaður í Svíþjóð. Þá á hann 51 leik fyrir yngri landslið Íslands og spurning hvort hér hafi íslenska A-landsliðið loks fundið hægri bakvörðinn sem hefur verið leitað að síðan Birkir Már Sævarsson kom heim úr atvinnumennsku.