Verja tæpum milljarði í framkvæmdir við gerð hjólastíga

Borgarráð Reykjavíkurborgar hefur ákvarðað að umhverfis- og skipulagssvið borgarinnar bjóði út framkvæmdir við gerð hjólastíga á nokkrum stöðum í borginni.

Ríkið kostar framkvæmdirnar upp á 570 milljónir króna en heildarkostnaðaráætlun er 960 milljónir króna.

Verkefnið rúmast innan hjólreiðaáætlunar og samgöngusáttmála Reykjavíkurborgar en það hefur þegar verið samþykkt í skipulags- og samgönguráði.

Verkefni ársins sem falla undir hjólreiðaáætlun eru eftirfarandi

Rafstöðvarvegur

Hæðargarður

Háaleitisbraut (Bústaðavegur – Fossvogur)

Hjólastæði, hjólateljarar og fræðsla ásamt eftirstöðvum verkefna frá fyrra ári. Þá verður unnið að undirbúningi og forhönnun vegna verkefna næsta árs.

Verkefni samgöngusáttmála eru:

Eiðsgrandi (Boðagrandi - Hringbraut)

Bústaðavegur (Veðurstofuvegur-Litluhlíð)

Bústaðavegur 151-153 ásamt undirgöngum

Bústaðavegur (brú yfir Kringlumýrarbraut).

Samkvæmt kostnaðaráætlun munu þessi verkefni kosta 960 milljónir króna. Þar af eru verkefni hjólreiðaáætlunar 390 milljónir króna og verkefni samgöngusáttmála 570 milljónir króna.