Formaður aðalstjórnar FH um ótrúlegan sigur á Dusty: „Einhver mesta innpökkun sem sést hefur lengi“

FH vann ótrúlegan 2-0 sigur á Dusty í undanúrslitum Stórmeistaramóts Vodafone deildarinnar. Rosalegur sigur þar sem Dusty er það næsta sem við komumst atvinnumannaliði hér á landi.

Áhugavert innslag um viðureign liðanna og viðtöl við formann aðalstjórnar FH, fyrirliða rafíþróttaliðsins og liðstjóra má sjá neðst í fréttinni.

„FH leggja Dusty 2-0, þetta er fyrirsögn,“ sagði Kristján Einar Kristjánsson, rafíþróttasérfræðingur, en hann lýsti viðureigninni.

„Að ná 12-0 er mjög sjaldgæft, þetta var bara rúst. Þeir [Dusty kunna kannski ekki alveg að bregðast við ef þeir tapa. Hvað gera þeir þá?“ sagði Auðunn Rúnar Gissurarson, fyrirliði rafíþróttaliðs FH.

Jafnframt sagði Auðunn Rúnar að leikmenn FH myndu æfa vel fram að úrslitaleik en hann fer fram á sunnudaginn.

Þá var rætt við Viðar Halldórsson, formann FH.

„Það er sama með rafíþróttadeildina og aðrar deildir, við viljum bara vinna og það er frábært að þeir séu komnir í úrslitin eftir að pakka Dusty saman í undanúrslitunum “ sagði Viðar kíminn.

„Mér skilst þetta sé einhver mesta innpökkun sem sést hefur lengi og það skiptir miklu máli, við viljum bara vinna,“ sagði Viðar kíminn áður en hann hélt áfram að strá salti í sár Dusty-manna.

„Ég held að flestir FH-ingar séu spenntir fyrir þessu og það skiptir máli því þetta er að verða hörkusport og við viljum vera í þeim íþróttagreinum sem eitthvað varið er í.“