Ættu að vera Ótta(r)slegnir að gefa Víkingum aukaspyrnu fyrir utan vítateig

Óttar Magnús Karlsson skoraði gull af marki þegar Víkingur sigraði Stjörnuna, 4-3, í æfingaleik í Víkinni í gær. Hann skoraði tvö mörk fyrir bikarmeistarana í leiknum sem og Viktor Örlygur Andrason.

Markið stórglæsilega skoraði Óttar með skoti beint úr aukaspyrnu sem fór í slána og inn, óverjandi fyrir Harald Björnsson í marki Stjörnunnar. Markið má sjá hér fyrir neðan.

Þetta er allavega þriðja markið sem Óttar skorar með skoti beint úr aukaspyrnu á svipuðum stað síðan hann kom aftur til Víkings um mitt síðasta sumar. Og öll þrjú aukaspyrnumörkin hafa verið á sama mark, því sem er nær félagsheimilinu.

Óttar skoraði tvö mörk beint úr aukaspyrnum á fimm dögum í ágúst í fyrra. Bæði komu þau í 3-1 sigrum Víkings.

Þann 11. ágúst skoraði Óttar beint úr aukaspyrnu þegar Víkingur vann ÍBV í 16. umferð Pepsi Max-deildarinnar. Hann endurtók svo leikinn í sigri á Breiðabliki í undanúrslitum Mjólkurbikarsins 15. ágúst. Óttar skoraði síðan markið sem tryggði Víkingum bikarmeistaratitilinn gegn FH 14. september.

Óttar og félagar í Víkingi mæta KR í Meistarakeppni KSÍ á Meistaravöllum á sunnudaginn. Fyrsti leikur Víkinga í Pepsi Max-deildinni er gegn Fjölnismönnum sunnudaginn 14. júní.