Birtist úr þokunni og þeyttist inn á slysstað

Mildi þykir að ekki fór verr þegar ökumaður missti stjórn á flutningabíl sínum í Texasríki í Bandaríkjunum á föstudag og ók inn á vettvang umferðarslyss. Myndband af atvikinu hefur vakið töluverða athygli.

Atburðarásinni er lýst í frétt CNN. Þar segir að viðbragðsaðilar hafi verið við rannsókn á árekstri tveggja bíla við hraðbraut númer 84 í Lubbock-sýslu í Texas þegar flutningabíll, þó ekki sá sami og náðist á myndband, kom akandi, rann til og rakst á bílana á slysstað. Fleiri bílar óku í kjölfarið inn á vettvang slyssins og úr varð margra bíla árekstur.

Skyggni var afar slæmt á svæðinu vegna þoku, líkt og sést í myndskeiði myndatökumanns sjónvarpsstöðvarinnar KCBD sem var á staðnum til að mynda bílana sem lent höfðu í árekstrinum. Í myndbandi hans sést svo annar flutningabíll birtast undan þokunni og þeytast inn á slysstaðinn.

Í frétt CNN af atvikinu segir að bíllinn hafi rekist á bæði lögreglumann og pallbíl áður en hann staðnæmdist í nærliggjandi skurði. Lögreglumaðurinn og ökumaður pallbílsins voru fluttir slasaðir á sjúkrahús en eru ekki taldir lífshættulega slasaðir.