Það sem ensku liðin þurfa að gera í dag til að komast áfram í Meistaradeildinni

Tottenham og Manchester City eru bæði búin að tryggja sér sæti í sextán liða úrslitum Meistaradeildarinnar en þriðjudagurinn 10. desember er aftur á móti leikur upp á líf eða dauða fyrir hin tvö ensku liðin í keppninni, Liverpool og Chelsea.

Tottenham og Manchester City eru í hópi átta liða sem eru komin áfram en hin eru Paris Saint-Germain, Bayern München, Juventus, Real Madrid, Barcelona og RB Leipzig. Átta sæti eru því í boði í leikjum Meistaradeildarinnar í dag og á morgun.

En hvað þurfa Liverpool og Chelsea að gera til að tryggja sér sæti í sextán liða úrslitunum?

Liverpool mætir Red Bull Salzburg á útivelli í dag og hefst leikurinn klukkan 17.55 að íslenskum tíma.

Liverpool er með 10 stig, einu stigi meira en Napoli og þremur stigum meira en Red Bull Salzburg.

Liverpool mistókst að tryggja sig áfram í síðustu umferð og má helst ekki tapa leiknum í Salzburg. Ef Liverpool tapar þá þarf liðið að treysta á að botnlið riðilsins, Genk, vinni Napoli á útivelli.

Red Bull Salzburg kemst áfram með sigri á Liverpool en Liverpool tryggir sig ekki aðeins áfram með sigri því liðið myndi einnig vinna riðilinn.

Fyrri leikurinn endaði með 4-3 sigri Liverpool á Anfield þannig að Liverpool kæmist því einnig áfram á innbyrðis leikjum ef Salzburg myndi vinna leikinn 5-4 eða 6-5. Þar erum við aftur á móti komin út í ímyndaða tölfræðileiki.

Chelsea kemst einnig áfram með sigri á franska liðinu Lille á heimavelli sínum, Stamford Bridge. Chelsea liðið gæti einnig komist áfram á jafntefli en aðeins ef Ajax myndi vinna Valencia á sama tíma. Leikur Chelsea og Lille hefst klukkan 20.00.

Ajax er á toppi riðilsins með tíu stig en Chelsea og Valencia eru síðan jöfn í 2. og 3. sæti með átta stig hvort lið. Valencia verður ofar verði liðin jöfn að stigum því spænska liðið stendur betur í innbyrðsileikjum liðanna.

Liðin sem eru komin áfram í 16 liða úrslit Meistaradeildarinnar:

A-riðill: Paris St-Germain (vinnur riðilinn), Real Madrid

B-riðill: Bayern München (vinnur riðilinn), Tottenham

C-riðill: Manchester City (vinnur riðilinn)

D-riðill: Juventus (vinnur riðilinn)

E-riðill: Ekkert

F-riðill: Barcelona (vinnur riðilinn)

G-riðill: RB Leipzig

H-riðill: Ekkert

Leikur Red Bull Salzburg og Liverpool verður sýndur beint á Stöð 2 Sport 2 og leikur Chelsea og Lille verður sýndur beint á Stöð 2 Sport 3. Meistaradeildarmessan hefst klukkan 19.15 á Stöð 2 Sport og þá verða einnig sýndir tveir aðrir leikir í beinni útsendingu eða: Inter - Barcelona (kl.20.00 á Stöð 2 Sport 2) og Ajax - Valencia (kl.20.00 á Stöð 2 Sport 4).