Chelsea jafnaði metið sem lið Heiðars Helgu setti

Neto fékk tvö gul spjöld með nokkurra mínútna millibili og var sendur snemma í sturtu.

Þetta var níunda rauða spjaldið hjá leikmönnum Chelsea á þessari leiktíð og með því jafnaði liðið metið á einu tímabili í ensku úrvalsdeildinni.

Metið áttu áður tvö lið, lið Sunderland frá 2008-09 tímabilinu og lið Queen Park Rangers frá 2011-12 tímabilinu.

Heiðar Helguson lék einmitt með þessu QPR-liði, skoraði átta mörk í sextán leikjum áður en hann meiddist í janúar og missti af nær öllu tímabilinu eftir það.

Heiðar var þó ekki einn af leikmönnum QPR sem fékk að líta rauða spjaldið á þessu mettímabili. Liðfélagar hans Joey Barton og Djibril Cissé fengu báðir tvö af þessum níu rauðu spjöldum.

Chelsea fær tíu leiki í viðbót til þess að slá metið.