Meistararnir fengið á sig næstflest mörk og með slökustu markvörsluna

Þegar 14 umferðum er lokið í Olís-deild karla hefur aðeins eitt lið fengið á sig fleiri mörk en Íslandsmeistarar Selfoss. Þá er Selfoss með slökustu hlutfallsmarkvörsluna í deildinni. Ekkert lið hefur hins vegar skorað fleiri mörk að meðaltali í leik en meistararnir.

Selfoss tapaði fyrir Val á heimavelli í gær, 31-33. Þetta er í áttunda sinn í vetur sem Selfyssingar fá á sig 30 mörk eða meira í leik.

Selfoss hefur fengið á sig 30,5 mörk að meðaltali í leik á tímabilinu. Aðeins nýliðar Fjölnis, sem eru í ellefta og næstneðsta sæti deildarinnar, hafa fengið á sig fleiri mörk, eða 30,6.

Á síðasta tímabili fékk Selfoss á sig 26,3 mörk að meðaltali í leik en tveggja af sterkustu varnarmönnum liðsins í fyrra nýtur ekki lengur við. Elvar Örn Jónsson fór til Skjern í sumar og þá sleit Sverrir Pálsson krossband í hné.

Markvarslan er einnig lakari en á síðasta tímabili. Í vetur eru markverðir Selfoss aðeins með 26,7% hlutfallsmarkvörslu að meðaltali í leik. Fjölnir og KA eru með næstslökustu markvörsluna, 27,8%, samkvæmt HB Statz.

Á síðasta tímabili, bæði í deild og úrslitakeppni, var markvarsla Selfyssinga 30,1%.

Selfyssingar geta þó lítið kvartað yfir sóknarleiknum það sem af er tímabili. Þeir hafa skorað mest í deildinni, 30,8 mörk að meðaltali í leik, og eru með bestu skotnýtinguna, 63,6%.

Selfoss er í 5. sæti deildarinnar með 17 stig, sex stigum á eftir toppliði Hauka.

Flest mörk á sig að meðaltali:

Fjölnir - 30,6

Selfoss - 30,5

HK - 29,4

KA - 28,9

ÍR - 27,9

FH - 27,7

Stjarnan - 27,1

ÍBV - 26,8

Fram - 26,1

Afturelding - 25,6

Haukar - 25,4

Valur - 23,8

Slakasta hlutfallsmarkvarslan:

Selfoss - 26,7%

Fjölnir - 27,8%

KA - 27,8%

ÍBV - 29,3%

Stjarnan - 29,4%

HK - 30,8%

Fram - 31,1%

Afturelding - 31,7%

FH - 32,1%

ÍR - 34,8%

Haukar - 35,7%

Valur - 36,4%