Útlendingastofnun tekur athugasemdum mjög alvarlega

Útlendingastofnun tekur athugasemdir aðstoðarmanns landlæknis og starfsfólks heilbrigðiskerfisins um að með flutningi konu til Albaníu í gær úr landi hafi verið farið gegn ráðleggingum sérfræðinga og heilbrigðisstarfsmanna mjög alvarlega. Þetta kemur fram í tilkynningu frá stofnuninni þar sem einnig kemur fram að búið sé að óska eftir fundi með embætti landlæknis svo hægt verði að fara yfir málið og kanna með hvaða hætti skuli standa að öflun læknisvottorða vegna slíkra mála.

Í yfirlýsingunni kemur fram að hvorki Útlendingastofnun né stoðdeild Ríkislögreglustjóra hafi aðgang að sjúkraskrám eða öðrum upplýsingum heilbrigðiskerfisins. Því þurfi starfsmenn þeirra að reiða sig á útgefin vottorð lækna til að byggja ákvarðanir á.

„Það er reynsla stofnunarinnar hingað til að þegar læknar telji óráðlegt af heilbrigðisástæðum að einstaklingur sé fluttur úr landi með flugi þá sé kveðið á um það með skýrum hætti í vottorði og er framkvæmd flutnings frestað í slíkum tilvikum,“ segir í yfirlýsingunni.

Konan kom hingað til lands ásamt manni sínum og barni og sótti um alþjóðlega vernd í byrjun október.

Sjá einnig: Tók afrit af vottorðinu því flóttafólk þurfi alltaf að bera sönnunarbyrðina

„Málið var afgreitt af Útlendingastofnun með ákvörðun um synjun í forgangsmeðferð þann 11. október. Í framhaldinu var málinu vísað til stoðdeildar Ríkislögreglustjóra sem ber ábyrgð á því að framkvæma ákvarðanir um flutning umsækjenda til síns heima. Undirbúningur stoðdeildar varðandi tilhögun á lögreglufylgd tekur sinn tíma en hann felst meðal annars í vali á ferðaleið og öflun samþykkis erlendra stjórnvalda fyrir gegnumför lögreglumanna í fylgd sem og stjórnvalda í móttökuríki. Þar að auki er það hlutverk starfsmanna stoðdeildar að ganga úr skugga um að ekki séu til staðar ástæður sem koma í veg fyrir framkvæmd flutningsins.“

Starfsmenn stoðdeildar höfðu samband við heilsugæsluna á höfuðborgarsvæðinu, sem annast þjónustu við umsækjendur um alþjóðlega vernd, og fékk vottorð frá lækni um að konan væri gengin rúmar 35 vikur og ferðafær. Það vottorð var gefið út þann 4. nóvember, eða degi fyrir brottvísun fjölskyldunnar. Það er í samræmi við reglur flugfélaga um aldur slíkra vottorða.

Seinna þann sama dag fór konan á kvennadeild Landspítala og var útskrifuð eftir miðnætti.

Lögregluþjónar fengu tilkynningu um það þegar konan var aftur komin í búsetuúrræðið þar sem hún hefur haldið til og fóru þangað og ræddu við hana. Samkvæmt áðurnefndri yfirlýsingu fengu þeir að sjá vottorðið og kom þar hvergi fram að fyrirhugaður flutningur væri óráðlegur né að hann myndi stefna öryggi hennar í hættu.

Því hafi verið ákveðið að hætta ekki við brottvísunina.

„Eins og settur forstjóri Útlendingastofnunar fór yfir í samtölum við fjölmiðla í gær var framkvæmdin í þessu tiltekna máli í samræmi við stefnu stjórnvalda um mannúðlega og skjóta afgreiðslu umsókna um alþjóðlega vernd og í samræmi við verklag Útlendingastofnunar og stoðdeildar ríkislögreglustjóra í slíkum málum,“ segir í yfirlýsingunni.