Bílstjórinn hefur verið ákærður fyrir manndráp

Hinn 25 ára gamli Maurice Robinson hefur verið ákærður fyrir 39 manndráp. Robinson var handtekinn á miðvikudag þegar 39 lík fundust í kælivagni vörubíls hans. Fólkið er talið vera frá Víetnam og Kína en óttast er að yfir hundrað innflytjendur hafi verið fluttir til Bretlands með þessum hætti.

Sjá einnig: Hinstu skilaboð ungrar konu sem lést í flutningabílnum

Robinson hefur einnig verið ákærður fyrir brot á innflytjendalögum, mansal og peningaþvætti en hann verður leiddur  fyrir dómara á mánudag. Þá hafa þrjú til viðbótar verið handtekin í tengslum við málið og eru í haldi lögreglu, grunuð um samsæri til mansals og manndráp. Lögreglan í Dublin handtók svo mann á þrítugsaldri sem er talinn geta tengst málinu.

Vörubílnum var ekið frá Búlgaríu og kom til Englands um hafnarborgina Holyhead í Wales síðastliðinn laugardag. Lögregla vinnur nú að því að því að bera kennsl á líkinn en að sögn lögreglu gæti það tekið töluverðan tíma.