„Ég er bara búinn með minn tíma og ætla nú að njóta þess að vera á leikjum KR. Mæta kannski klukkutíma fyrir leik sem verður töluverð breyting. Ég hef alltaf mætt tímanlega fyrir alla leiki – heimaleiki sérstaklega. Þetta verður án efa skrýtið enda búið að vera stór hluti af lífi mínu í langan tíma. Trúlega veit ég ekkert hvernig ég á að vera – það kemur bara í ljós,“ segir hann léttur.

Talandi um Evrópukeppnina þá segir Kristinn það vera gott aukakrydd í tilveruna á stuttu íslensku sumri. Hann hefur farið með liðinu víða um Evrópu og segist eiga margar góðar minningar á þessum 20 árum. „Við unnum Zilina einu sinni sem hafði verið í Meistaradeildinni með Chelsea og Marseille. Við höfum spilað okkar heimaleiki á KR-vellinum en ekki í Laugardalnum sem er ákveðið forskot að mínu mati. Mér er minnisstætt þegar við spiluðum við Basel og Fram átti heimaleik á sama tíma. Helmingur stuðningsmanna Basel birtist í Laugardalnum og kom 20 mínútum of seint í Frostaskjól. Þá vorum við 2-0 yfir.

Kristinn hefur haldið með KR frá blautu barnsbeini. Fyrsti leikurinn sem hann fór á var þó ekki með KR heldur viðureign ÍA og Breiðabliks. „Þegar ég var fimm ára bjó ég eitt ár hjá ömmu og afa þegar foreldrar mínir voru að byggja úti á Seltjarnarnesi. Þá fór pabbi með mig á völlinn á viðureign ÍA og Breiðabliks. Ég var svo hrifinn af gulum búningum, hafði nýlega séð Arsenal vinna Manchester United. Siggi frændi minn, sem bjó í kjallaranum hjá ömmu og afa, var ekki sáttur við þetta og keypti handa mér KR-búning. Sagði að ég ætti að halda með KR og Liverpool sem ég og gerði. Ég fylgdi því og þetta er eiginlega honum að kenna – eða þakka öllu heldur.“
Eftir 20 ár og 19 stóra titla er komið að leiðarlokum og segist Kristinn geta litið nokkuð stoltur í baksýnisspegilinn. Hann viðurkennir að hafa stundum hugsað að eitthvað hefði átt að gera svona eða hinsegin. Umtalið um KR hefur alltaf verið mikið og það eru mörg símtölin sem formaðurinn hefur tekið við KR-inga í gegnum tíðina. Það er þó eiginlega bara eitt sem nísti inn að beini á öllum þessum árum. „Ég tók það inn á mig þegar stelpurnar okkar féllu hér um árið. Það var sárt. Maður hefur eiginlega verið viðkvæmastur fyrir umræðunni um stelpurnar – að við séum ekki að gera nóg. Þar erum við að gera okkar besta. Skoðanir á því sem við erum að gera eru alltaf miklar og það verður alltaf þannig í KR. Það hafa allir rétt á sinni skoðun. En þessir frábæru einstaklingar sem hafa verið og eru áfram hafa alltaf sett KR í fyrsta sætið – ég fullyrði það.“