Fleiri kveðja Arion banka

Rakel Óttarsdóttir, framkvæmdastjóri upplýsingatæknisviðs Arion banka, hefur óskað eftir að láta af störfum. Þetta kemur fram í tilkynningu frá Arion banka.

Rakel hefur setið í framkvæmdastjórn bankans frá árinu 2011 þegar hún tók við starfi framkvæmdastjóra þróunar- og markaðssviðs. Hún tók við starfi framkvæmdastjóra upplýsingatæknisviðs árið 2016. Hún mun láta af störfum föstudaginn 20. september næstkomandi.

„Rakel hefur starfað hjá bankanum frá árinu 2005 og í störfum sínum haft mikil áhrif á þróun bankans, ekki síst á sviði stafrænna lausna þar sem bankinn hefur verið í forystuhlutverki á undanförnum árum. Ég þakka Rakel hennar góðu störf og óska henni velfarnaðar í framtíðinni,“ segir Benedikt Gíslason, bankastjóri Arion banka.

Benedikt tók einmitt nýlega við starfi bankastjóra eftir að Höskuldur Ólafsson lauk störfum í apríl eftir níu ár í starfi. Kostnaður Arion banka við starfslokin námu 150 milljónum króna eins og fram hefur komið.

Þá sagði Jónína S. Lárusdóttir, framkvæmdastjóri lögfræðisviðs Arion banka, upp störfum á dögunum. Hún hafði verið framkvæmdastjóri í níu ár og setið í framkvæmdastjórn.