Greenwood byrjar í fyrsta sinn gegn Rúnari Má og félögum

Ole Gunnar Solskjær, knattspyrnustjóri Manchester United, hefur staðfest að hinn 17 ára Mason Greenwood verði í byrjunarliðinu gegn Astana í Evrópudeildinni annað kvöld. Þetta verður fyrsti keppnisleikur hans í byrjunarliði United. 

Strákurinn vakti athygli fyrir góða spilamennsku á undirbúningstímabilinu og hefur komið inn á í fjórum leikjum í ensku úrvalsdeildinni í vetur.

Markvörðurinn Sergio Romero, varnarmaðurinn Axel Tuanzebe og miðjumaðurinn Fred verða einnig í byrjunarliðinu á morgun, í fyrsta sinn á tímabilinu.

Walesverjinn Daniel James verður hins vegar fjarri góðu gamni vegna meiðsla.

Rúnar Már Sigurjónsson leikur með Astana. Á morgun fær Skagfirðingurinn tækifæri til að leika gegn liðinu sem hann hefur alltaf stutt, Manchester United.

Leikurinn annað kvöld er fyrsti keppnisleikur liðs frá Englandi og Kasakstan.