ESPN kroppamyndirnar af Katrínu Tönju komnar í birtingu

Katrín Tanja Davíðsdóttir situr fyrir í nýjasta Body Issue ESPN tímaritsins. Myndirnar eru komnar í birtingu en þær voru allar teknar á Íslandi. 

Katrín Tanja er í hópi frægra íþróttamanna sem voru til í að láta taka af sér smekklegar nektarmyndir þar sem sjást vel vöðvarnir á vel þjálfuðum líkömum þeirra.

Katrín Tanja er tvöfaldur heimsmeistari í CrossFit og ein af risastjörnunum í greininni. Það er því ekkert skrítið að ESPN hafi sóst eftir að fá að mynda hana fyrir þetta árlega blað sitt sem hefur komið út frá árinu 2009. Hún er sú fyrsta úr CrossFit sem fær að vera með.

Margir eru örugglega forvitnir að sjá hvernig myndirnar af Katrínu Tönju koma út og nú geta þeir hinir sömu svalað forvitni sinni.

ESPN blaðið sjálft kemur ekki út fyrr á föstudaginn en í dag má nálgast myndirnar af íþróttafólkinu á heimasíðu ESPN. Þetta er í síðasta skiptið sem blaðið kemur út á prenti en framtíðarheimili Body Issue ESPN verður á netinu.

Myndirnar af Katrínu Tönju voru teknar á frægum ferðamannastöðum á suðurlandi Íslands eins og við Seljalandsfoss og í klettunum við Reynisfjöru. Það má meðal annars sjá okkar konu gangandi nakta um á höndum á malarvegi. Hér má sjá eitthvað af myndunum.

Katrín Tanja var líka tekin í viðtal sem má sjá í myndbandinu á milli þess að við fáum að sjá hvernig ljósmyndarar ESPN og starfsmenn blaðsins fóru að í myndatökunni út í náttúru Íslands.

Okkar konu leið vel í myndatökunum og er stolt af því að fá að vera með í „Body Issue“ ESPN tímaritsins.https://t.co/6P8Xfxj9GU

— Sportið á Vísi (@VisirSport) August 29, 2019

Katrín segir að vera í Body Issue ESPN sé eitt af því sem hana dreymdi um að fá að gera og nú hefur sá draumur ræst. Katrín Tanja hefur verið aðdáandi Body Issue blaðsins í langan tíma.  

„Þarna eru komnir saman allir þessir stórkostlegu líkamar hjá fólki sem er í hópi þeirra bestu í heimi í sinni grein en um leið eru þeir allir svo ólíkir,“ segir Katrín Tanja meðal annars í viðtalinu.

Hún ræðir líka sína eigin líkamsvitund við blaðamann ESPN.

„Ég veit að fullt af fólki finnst ég vera með of mikla vöðva, of stór, of grönn eða of mjó. Það er alltaf eitthvað sem fólk getur gagnrýnt og allir hafa ólíkar skoðanir. Minn líkami er sönnun þeirrar miklu vinnu sem ég hef lagt á mig. Vöðvarnir koma til vegna allra endurtekninganna sem ég hef tekið síðan að ég var lítill krakki. Ég er svo stolt af því,“ sagði Katrín Tanja og bætti við:

„Það hefur tekið mig nokkurn tíma að komast þangað en ég dag er ég mjög stolt af líkama mínum í dag,“ sagði Katrín Tanja.

Að neðan má sjá myndband um myndatökuna sem fram fór í náttúru Íslands.