Fær þrjá milljarða króna í kveðjugjöf

Þó svo Indianapolis Colts sé í erfiðum málum þar sem Andrew Luck lagði skóna óvænt á hilluna þá ákvað félagið að gefa leikstjórnandanum þrjá milljarða króna.

Luck fékk stóran bónus frá Colts er hann framlengdi við félagið árið 2016 og þar sem hann er hættur þá bar honum að greiða ansi háa summu til baka. Colts nennti ekkert að spá í því og sagði honum bara að halda peningunum. Alvöru kveðjugjöf.

Hinn skilningsríki eigandi Colts, Jim Irsay, segir að þetta sé flókið því Luck sé í raun að gefa eftir miklu hærri upphæð með því að hætta. Hann hefði vel getað bitið á jaxlinn og grætt mun meira á næstu árum. Hann hefði aftur á móti ekki treyst sér í það.

Luck er aðeins 29 ára gamall en meiðsli hafa leikið hann grátt síðustu árin og hann treystir sér því ekki til þess að halda áfram. Hann var valinn fyrstur í nýliðavalinu árið 2012 og hefur verið með bestu leikstjórnendum deildarinnar þegar hann hefur getað spilað.